როგორც იქნა, დადგა ეს დღეს: 24 ნოემბერს, თბილისის ივ. ჯავახიშვილის სახელობის სახელმწიფო უნივერსიტეტში, განხორციელდა ჩემი სადოქტორო დისერტაციის დაცვა, – ამის შესახებ საქართველოს საგანგებო და სრულუფლებიანი დესპანი გერმანიაში, ისტორიის დოქტორი და საქართველოს პირველი პრეზიდენტის შვილი, კონსტანტინე გამსახურდია სოციალურ ქსელში წერს.
“როგორც იქნა, დადგა ეს დღეს: 24 ნოემბერს, თბილისის ივ. ჯავახიშვილის სახელობის სახელმწიფო უნივერსიტეტში, განხორციელდა ჩემი სადოქტორო დისერტაციის დაცვა, ჰუმანიტარულ მეცნიერებათა ფაკულტეტზე, სათაურით “ირანული და სემიტური კულტურული ნაკადები ადრექრისტიანულ იბერიაში და მათი მოგვიანო მწიგნობრული რეცეფცია”.
თემა ინტერდისციპლინარულია: ირანისტიკა, სემიტოლოგია, ქართველოლოგია, არმენისტიკა, რელიგიების ისტორია, კულტურის ისტორია, არქეოლოგია, ფილოლოგია, სემიოტიკა. მივიღე უმაღლესი შეფასება სუმა ცუმ ლაუდა – 99 ქულა.
ძალიან მოკლედ მოვყვები ამ ნაშრომის ისტორიას: მისი დაცვის პირველი ეტაპი განხორციელდა 1990 წლის ბოლოს. ამ დროისთვის დასრულებული მქონდა ასპირანტურა, როდესაც საქართველოს სსრ მეცნიერებათა აკადემიის აღმოსავლეთმცოდნეობის ინსტიტუტში სამეცნიერო საბჭომ ნაშრომი მოიწონა და მომეცა რეკომენდაცია, გამეგზავნა მოსკოვში, “ვაკ”-ში, თუმცა ცნობილი ისტორიული მოვლენების გამო ეს ამბავი ვერ მოხდა, სსრკ-ც დაიშალა.
შემდეგ, შვეიცარიული ემიგრაციის წლებში დაცვა უნდა მომხდარიყო ბაზელის უნივერსიტეტში 2000 წლისთვის, სადაც წარმატებით გავიარე 4 სემესტრი და სემინარებიც ჩავაბარა, თუმცა დაცვა ბანალურად მარტივი მიზეზების გამო ვერ მოხერხდა და ამაზე აღარ შევჩერდები.
საქართველოში დაბრუნების შემდგომ ჩემდა სამწუხაროდ გამომრჩა საბჭოთა ასპირანტურის დოკუმენტების ნოსტრიფიკაციის საბოლოო თარიღი – 2009 წლის 31 დეკემბერი, როდესაც შეიძლებოდა საბჭოთა ასპირანტურის აღიარება სპეციალური სამეცნიერო კომისიის მიერ უკვე დამოუკიდებელი საქართველოს კანონმდებლობით. ამის შედეგად ეს ყველაფერი გამიუქმდა, რის გამოც იძულებული გავხდი 2015 წელს თავიდან ჩამებარებინა დოქტორანტურაში, ივ. ჯავახიშვილის სახელობის თბილისის უნივერსიტეტში, რაც 2019 წლის ბოლოს წარმატებით დავასრულე. საქმე კოვიდის ამბების გამოც გაიწელა. რაც შეეხება ნაშრომს, (სულ 290 გვ.) იგი სრულიად განვაახლე, რამდენადაც მეცნიერება 30 წლის მანძილზე წინ წავიდა. სადისერტაციო საბჭოს თავმჯდომარე იყო პროფესორი თედო დუნდუა, ოპონენტები პროფესორი მარიკა მშვილდაძე და პროფესორი იულონ გაგოშიძე. მადლობა ყველას, ვინც პოზიტიური წვლილი შეიტანა, რათა ეს საქმე ბოლომდე მიმეყვანა”, – წერს კონსტანტინე გამსახურდია.