„ლეიბორისტული პარტიის“ ლიდერმა, შალვა ნათელაშვილმა საქართველოში ევროკავშირის, აშშ-სა და გერმანიის მოქმედი ელჩების მუშაობა შეაფასა.
„რუსთავი 2“-ის ეთერში სტუმრობისას ნათელაშვილმა გერმანიის ელჩი ჰუბერტ ქნირში გააკრიტიკა, კარლ ჰარცელი და კელი დეგნანი კი დადებით კონტექსტში მოიხსენია.
„ევროკავშირის ელჩი არის ნამდვილი დიპლომატი, მიუკერძოებელი და ძალიან მაღალი კლასის მოღვაწე. ამერიკის შეერთებული შტატების ელჩი საკმაოდ გავლენიანი დიპლომატია, შეიძლება ითქვას, ფაქტობრივად, სამხედრო დიპლომატია, რადგან დედამიწის ყველა ცხელ წერტილში ნამყოფია. დახვეწილი პიროვნებაა.
რაც შეეხება გერმანიის ელჩს, ის გამობრძანდა მაშინ, როცა 20 ივნისს თვალები დათხარეს ჩვენს ბავშვებს და განაცხადა, რომ ყველაფერი კანონის მიხედვით მიდიოდა. ვუყურებდი პარლამენტის ფანჯრიდანო. შენ მამაცხონებულო, თუ ელჩი ხარ, რა გინდა შუაღამისას პარლამენტის ფანჯარაში, გახარიას გვერდზე და რატომ ტკბები იმით, რომ ბავშვებს თვალებს თხრიან.
როგორც ერიკ ფურნიე, საფრანგეთის გათახსირებული ელჩი, ფინანსდებოდა ბიძინა ივანიშვილისგან და მილიონერი წავიდა აქედან, ცოლის სახელზე გააფორმა ამისგან ნაჩუქარი მილიონები, ასევე ეს გერმანიის ელჩიც, ყურამდე რომ აქვს პირი გახსნილი პირი სახაჭაპურედ, ფინანსდება ამისგან“, – განაცხადა ნათელაშვილმა.