დაავადებათა კონტროლის ცენტრის ხელმძღვანელმა, ამირან გამყრელიძემ განაცხადა, რომ COVAX პლატფორმასთან თანამშრომლობის პარალელურად საქართველო მუშაობს უშუალოდ მწარმოებელ კომპანიებთან და დიდ ქვეყნებთან საგარეო საქმეთა სამინისტროს მეშვეობით, რათა შესაძლებელი იყოს ვაქცინების კიდევ უფრო ადრე მიღება.
„ეს გაცილებით რთული იქნება, მაგრამ ამ მიმართულებითაც ვმუშაობთ. ამისთვის შეიქმნა საკოორდინაციო კომიტეტი, რომელსაც ჯანდაცვის მინისტრის მოადგილე თამარ გაბუნია ხელმძღვანელობს. კოვიდ ვაქცინის დანერგვის გეგმის შემუშავებაში ტექნიკურ დახმარებას გვიწევს ჯანმო. უკვე განიხილება ამ გეგმის მონახაზი. იმის მიხედვით, თუ რომელი ქვეყნის ვაქცინა გვექნება საქართველოში, იმუნიზაციის განხორციელების სხვადასხვა ტემპერატურული რეჟიმი არსებობს და თითოეულ რეჟიმზე შესაბამისი სამუშაო გეგმა დგება“, – განაცხადა გამყრელიძემ.