ვაქცინაცია ყველასთვის რეკომენდირებულია. ჯანდაცვის მსოფლიო ორგანიზაცია არ ამბობს, ვისაც დაავადება გადატანილი აქვს, მას არ სჭირდება ვაქცინაცია, – ამის შესახებ ჯანდაცვის მინისტრის მოადგილე თამარ გაბუნიამ „დღის ქრონიკაში“ განაცხადა.
მან ვაქცინაციის პროცესში კერძო სექტორის მონაწილეობაზეც ისაუბრა და აღნიშნა, რომ ეს სექტორი ჯანდაცვის სისტემის ყველაზე დიდი მიმწოდებელია.
„ისინი აქამდეც აქტიურად მონაწილეობდნენ იმუნიზაციის პროგრამაში. თუ ჩვენ გვექნება ვაქცინა, რომელიც საჭიროებს კომპლექსური, ცივი ჯაჭვის მოთხოვნებს, მაგალითად „პფაიზერი“, საუბარი შერჩეულ დიდ კლინიკებზე, სადაც პირველად დაიწყება ვაქცინაცია, თუმცა სხვა ვაქცინებისთვის, რომელიც რუტინული მოხმარების ცივ ჯაჭვთან იქნება ახლოს, ამ შემთხვევაში მისი შესრულება შეიძლება ყველგან და კერძო სექტორი ბუნებრივია აქტიურად ჩაერთვება. ჯერჯერობით რა თქმა უნდა, სახელმწიფო დაფარავს ვაქცინასთან დაკავშირებულ ხარჯებს, რადგან ეს არის პირველი რიგის საზოგადოებრივი ჯანდაცვის მნიშვნელობის ამოცანა, თუმცა შემდეგ უკვე ვნახოთ, როგორ განვითარდება მოვლენები“, – განაცხადა თამარ გაბუნიამ.
მისივე თქმით, ვაქცინაცია ნებაყოფლობითია და ადამიანმა თავად უნდა მიიღოს გადაწყვეტილება, გაიკეთებს თუ არა მას.
„მან თავად უნდა მიიღოს გადაწყვეტილება რისკებისა და სარგებლის შეფასების საფუძელზე. რა თქმა უნდა, აუცილებლად იქნება აქტიური საინფორმაციო კამპანია, რაც უკვე დაწყებულია“, – აღნიშნა თამარ გაბუნიამ.