საქართველოს მთავრობას პარლამენტისგან ექნება სრული საკანონმდებლო მხარდაჭერა იმისთვის, რომ დროულად მივიღოთ ვაქცინა და დავიწყოთ ვაქცინაციის პროცესი, – ამის შესახებ პარლამენტის თავმჯდომარემ არჩილ თალაკვაძემ ბიუროს სხდომაზე, საზოგადოებრივი ჯანდაცვის შესახებ კანონში ცვლილებების პროექტზე საუბრისას განაცხადა.
მისივე განცხადებით, საკანონმდებლო ცვლილებებს, რომელიც ინიცირებულია ჯანდაცვის კომიტეტის მიერ, პარლამენტი ყველა ვადის დაცვით მიიღებს.
„ზუსტად იმ ვადებში, როდესაც საქართველოს პირობები და ვალდებულებები უნდა ჰქონოდა შესრულებული, ვასრულებთ ცვლილებას და პარლამენტის მხრიდან, ეს პირობა უზრუნველყოფილი იქნება“ – განაცხადა არჩილ თალაკვაძემ.
პარლამენტში უკვე დაჩქარებული წესით დაინიცირდა საზოგადოებრივი ჯანმრთელობის შესახებ კანონში ცვლილებების პროექტი, რომლის მიხედვითაც, კორონავირუსის საწინააღმდეგო პროფილაქტიკური აცრისთვის ან მკურნალობისთვის, შესაძლებელი იქნება მხოლოდ ჯანდაცვის მსოფლიო ორგანიზაციის მიერ აღიარებული ვაქცინის შემოტანა. ამასთან, ჩატარებული აცრების შემდგომი გვერდითი მოვლებენების ან გართულებების განვითარების შემთხვევაში, სახელმწიფო, კანონით დადგენილი წესით, უზრუნველყოფს მოსახლეობის უფასო სამედიცინო მომსახურებასა და რებილიტაციას, გარდა იმ შემთხვევებისა, როდესაც პრევენციული აცრების შემდგომი გვერდითი მოვლენები გამოწვეულია იმპორტიორის, სამედიცინო პერსონალის თუ დაწესებულების დაშვებული შეცდომით.