“არათუ არ დაიცვეს მელია, სწრაფად გაქრნენ მისი დაკავების პროცედურებისას”

“ე.წ. პოლიტიკური ლიდერები აცხადებდნენ, რომ ნიკა მელიას კბილებით დაიცავდნენ, ფიზიკურად დაიცავდნენ. როგორც ვნახეთ, არათუ არ დაიცვეს მელია, სწრაფად გაქრნენ მისი დაკავების პროცედურების დროს და მხარდამჭერთა მცირე რაოდენობა შეატოვეს”, – ამის შესახებ ექსპერტმა უსაფრთხოების საკითხებში, ანალიტიკოსმა ლევან ნიკოლეიშვილმა მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
ნიკოლეიშვილმა „ნაციონალური მოძრაობის“ თავმჯდომარის, ნიკა მელიას დაკავება და ქვეყანაში განვითარებული პოლიტიკური პროცესები შეაფასა.
„ძალიან ცუდია, რომ რამდენიმე მედიასაშუალებამ ამას სპეცოპერაცია დაარქვა. ეს არავითარი სპეცოპერაცია არ გახლავთ. სპეცოპერაცია არის ისეთი სახის ღონისძიება, როდესაც სპეციალური დანიშნულების ქვედანაყოფები არიან ჩართულები, განსაკუთრებით მაშინ, როცა ტერორიზმთან მიმართებით გვაქვს საქმე. მიუხედავად იმისა, რომ ეს ოპერაცია წარიმართა შსს-ს მიერ, მას ჰქვია საპოლიციო ღონისძიება, რომლის მიზანი იყო, დაეკავებინათ დამნაშავე, რომელმაც სასჯელი სასამართლოს გადაწყვეტილების თანახმად მიიღო. შსს-ს აქვს ვალდებულება, რომ განახორციელოს ასეთი სახის ღონისძიება. ეს ღონისძიება აბსოლუტურად მაღალ პროფესიონალურ დონეზე ჩატარდა. თუ დავაკვირდებით იმ კადრებს, რომელიც სხვადასხვა მედიასაშუალების მეშვეობით გავიდა, ვერ ნახავთ, რომ რომელიმე პოლიციელს ან სპეციფიკური იარაღი გააჩნდეს ან ხელკეტი ეჭიროს ხელში. ჩატარდა ოპერაცია, როგორც დაგეგმილი ჰქონდათ და დააკავეს მელია.
რაც შეეხება იქ გამაგრებული ადამიანების პოზიციებს, მელია ამ შემთხვევაში კიდევ ერთხელ მოტყუებული აღმოჩნდა. კიდევ ერთხელ დავრწმუნდით, რომ ყველას აწყობდა მისი დაპატიმრება, გარდა – თავად მელიასი. გვახსოვს, თუ რას აცხადებდნენ იქ გამაგრებული ე.წ. პოლიტიკური ლიდერები, რომ მელიას კბილებით დაიცავდნენ, ფიზიკურად დაიცავდნენ და ა.შ. როგორც ვნახეთ, არათუ არ დაიცვეს მელია, სწრაფად გაქრნენ დაკავების პროცედურების დროს და მხარდამჭერთა მცირე რაოდენობა შეატოვეს. ისინი ასე იქცევიან ყოველთვის. მიტინგების დაშლის დროსაც, შეატოვებდნენ ხოლმე ადამიანებს და შემდეგ პოზირებას იწყებდნენ ტელესაშუალებების მეშვეობით“, – განაცხადა ლევან ნიკოლეიშვილმა.