გვიან ღამით ჟურნალისტ ვახო სანაიას და მის ოჯახს თავს დაესხნენ. შემთხვევა მცირეწლოვანი ბავშვის თანდასწრებით მოხდა. თავდასხმის დეტალები სანაიამ ცოტა ხნის წინ “ფორმულასთან” საუბარში გაიხსენა.
“ამ წუთასაც თავის ტკივილი მაქვს. ექსპერტიზიდან გამოვედი, დაზიანებები მაქვს როგორც თავზე, ასევე სხეულის სხვადასხვა მიდამოში. წუხელ დაახლოებით პირველის ნახევარზე, ჩემი მეუღლე, ჩემი შვილი და ძიძა, ჩამოვიდნენ თურქეთიდან.
ბავშვი იყო სამკურნალოდ წაყვანილი და აეროპორტში დავხვდით მე და ჩემი რძალი. წამოვედით ვაკეში, სადაც დავტოვეთ ერთი ადამიანი და როცა სახლში ვბრუნდებოდით, გზა მოყინული იყო, ვერ ვბრუნდებოდით და გამოვიძახეთ სამაშველო სამსახური.
ამასობაში გამოჩნდა 3 ადამიანი, ერთ-ერთი ეცნო ჩემს მეუღლეს, იმიტომ რომ მისი ყოფილი მეზობელი იყო. ყველანაირად ცდილობდა ერთ-ერთი მე გამოვეწვიე.
სამაშველოს ჰყავდა ჩაბმული ჩვენი მანქანა და ცდილობდა ავეყვანეთ გზაზე. ამას აკეთებდა 5 მაშველი. როდესაც ჩვენ მანქანას ვაწვებოდით და ვეხმარებოდით მაშველებს, მიწვევდა. ვუთხარი დამანებე თავი, ჩემს საქმეს ვაკეთებ-მეთქი. სამივე პირი ნასვამი იყო. შემდეგ ერთ-ერთმა ჩამოიხსნა შარფი და მითხრა, კარგად დაიმახსოვრე ჩემი სახე და დაიწყო მუქარა. ამის შემდეგ დაიწყო გინება და მუშტებმოღერებული უნდა დამსხმოდა თავს და წაიქცა ისიც და მეც.
წაქცეული როცა ვიყავი, დანარჩენი ორი მოვიდა და დამიწყეს ფიზიკური შეურაცხყოფა. ამ დროს ჩემი მეუღლე და ჩემი რძალი გადმოვიდნენ ავტომობილიდან და რძალსაც კი დაარტყეს.
პირდაპირ აგრესია ჰქონდათ ჩემს მიმართ, როგორც მედიის წარმომადგენლების მიმართ. მიცნეს და ამის შემდეგ დაიწყეს პროვოცირება. ბავშვი ძიძას ეჭირა, ისტერიკულად ტიროდა და მაინც არ ჩერდებოდნენ. სამაშველო სამსახურზე ჩაბმული იყო ჩვენი მანქანა, მოვიდნენ, ჩაერივნენ და შუაში ჩადგნენ ისინი” – იხსენებს სანაია.
ჟურნალისტმა ასევე მადლობა გადაუხადა სამაშველო სამსახურს.