ფრაქცია „ქართული ოცნების” თავმჯდომარის, მამუკა მდინარაძის განცხადებით, „ქართული ოცნების“ ცენტრალურ ოფისში პოლიტიკური საბჭოს სხდომაა ჩანიშნული, რომელზეც მოლაპარაკებების საკითხს კიდევ ერთხელ განიხილავენ.
„ოპოზიციის მხრიდან კონკრეტული, კონსტრუქციული ან პრაგმატული და კომპრომისთან მიახლოებული რაიმე წინადადებაც კი არ მოგვისმენია. კიდევ ერთხელ მოვუწოდებთ მათ, რომ მოვიდნენ და ერთი კომპრომისი მაინც წარმოადგინონ. დღეს „ქართული ოცნების“ ოფისში გაიმართება პოლიტსაბჭოს სხდომა. ჩვენ კიდევ ერთხელ ვიმსჯელებთ ამ საკითხებზე, რათა მაქსიმალურად უზრუნველვყოთ ჩვენი მეგობრების, პარტნიორების რჩევების, მოთხოვნებისა და თხოვნების რეალიზება“ – აღნიშნა მამუკა მდინარაძემ.
„ქართული ოცნება-დემოკრატიული საქართველოს“ ცენტრალურ ოფისში პარტიის პოლიტიკური საბჭოს სხდომა 19:00 საათზეა ჩანიშნული.