გუმათჰესთან სამართალდამცველებმა რკინის ჯებირების ნაწილი აიღეს, თუმცა აქციის მონაწილეები გზის სავალი ნაწილის ხელოვნური ბარიკადებისგან სრულად გათავისუფლებას ითხოვენ და აცხადებენ, რომ ბრძოლა ნამახვანჰესის წინააღმდეგ გრძელდება.
აქციის ორგანიზატორები ექსპერტთა საბჭოს შექმნის ინიციატივასაც ეხმაურებიან და ამბობენ, რომ ვიდრე მათ მოთხოვნებზე მთავრობის პასუხი ცნობილი არ იქნება, მანამდე ახალ ინიციატივებზე შეფასებები ნაადრევია.
„კედლის ნახევრად აღება არაფერს ცვლის. ჩვენ ვითხოვთ გადაადგილების უფლებასა და ნამოხვანში, ჩვენი პროტესტის ძირითად ადგილზე დაბრუნებას. შესაბამისად, ვიდრე გადაადგილების უფლება არ მოგვეცემა, ნახევრადაღებული კედელი ჩვენთვის არსებითად არაფერს ცვლის. ბუნებრივია, მათგან პირობების შესრულებას დაველოდებით“ – ამბობს „რიონის ხეობის გადარჩენისთვის“ დამფუძნებელი, ვარლამ გოლეთიანი.
დღეს სოფელ გუმათში რკინის კედლის ერთი ნაწილი აიღეს.