საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა, რომ რუსეთის ხელისუფლებამ პატიმრობაში მყოფ ალექსეი ნავალნისთან ექიმები უნდა დაუშვას.
„ევროკავშირი ღრმად შეშფოთებულია გავრცელებული ინფორმაციით, რომ ალექსეი ნავალნის ჯანმრთელობის მდგომარეობა კიდევ უფრო გაუარესდა. მოვუწოდებთ რუსეთის ხელისუფლებას, დაუყოვნებლივ დაუშვას მასთან სამედიცინო სპეციალისტები, რომლებსაც ის ენდობა. რუსეთის ხელისუფლება პასუხისმგებელია ალექსეი ნავალნის უსაფრთხოებასა და ჯანმრთელობაზე“, – ნათქვამია განცხადებაში.
18 აპრილს, ალექსეი ნავალნის ექიმმა, იაროსლავ აშიმხინმა განაცხადა, რომ პატიმრობაში მყოფი ოპოზიციონერი, შესაძლოა, ნებისმიერ წუთს მოკვდეს.
მისი განცხადებით, ნავალნის სისხლის ანალიზის შედეგების თანახმად, კალიუმის დონე იმდენად მაღალია, რომ, შეიძლება, გულის გაჩერება გამოიწვიოს. ის ასევე ამბობს, რომ გაზრდილია კრეატინინის დონეც, რაც თირკმელების ფუნქციონირების დაქვეითებაზე მიანიშნებს.