საპარლამენტო უმრავლესობის წევრების თქმით, ხელისუფლებამ შეთანხმების დოკუმენტს ხელი ცალმხრივად უკვე მოაწერა და მათთვის გაუგებარია, თუ რატომ გახდა საჭირო ახალი ვარიანტი შემუშავებულიყო. მათი თქმით, ამის საფუძველი არ არსებობს.
“ჩვენ ხელი მოვაწერეთ უკვე შარლ მიშელის მიერ შემოთავაზებულ შეთანხმების დოკუმენტს. რაც შეეხება ახალ ვარიანტს, ჩვენთვის გაუგებარია საერთოდ ახალი ვარიანტის შემოთავაზების საფუძველი რატომ არსებობს. ის, რომ ჩვენ ცალმხრივად ხელი მოვაწერეთ შარლ მიშელის დოკუმენტს, დავადასტურეთ, რომ ჩვენი აზროვნება სახელმწიფოებრივია და ველოდებით ოპოზიციის პასუხს,” – განაცხადა გურამ მაჭარაშვილმა.
მმართველი გუნდის წევრების თქმით, ოპოზიცია აგრძელებს დესტრუქციულ ქმედებებს და მათი მიზანი შეთანხმების მიღწევა არაა.
“საზოგადოება ნათლად ხედავს რომ ოპოზიციის უმეტესობა ამ ახალ ვერსიასაც კი არ აწერს ხელს და აკეთებენ ყველანაირად დესტრუქციულ განცხადებებს, რაც ნიშნავს იმას, რომ მათ არ აქვთ ინტერესი რაიმე სახის კომპრომისზე წავიდეს, თუნდაც მცირედი კონსტრქციულობა შეიტანონ მოლაპარაკების პროცესში. როგორც ჩანს მათი ამოცანა არის, ის, რომ არჩევნების გარეშე მიხეილ სააკაშვილს გადაბარდეს ხელისუფლება, რაც არის ბოდვა და არასდროს არ მოხდება,” – აღნიშნა რატი იონათამიშვილმა.