თვითმმართველობის არჩევნებში ჩვენ კვლავ ერთად და დამაჯერებლად გავიმარჯვებთ, ვინაიდან „ქართულმა ოცნებამ“ აჩვენა, რომ მისთვის უმთავრესი არის თანამოქალაქეებისა და სახელმწიფოს ინტერესები. აჩვენა, რომ ქვეყანაში არის ყველაზე პასუხისმგებლიანი, მთავარი გადაწყვეტილებების მიმღები პოლიტიკური ძალა და, რასაკვირველია, ჩვენ 40 და 43%-იან ბარიერსაც დამაჯერებლად გადავლახავთ, ეფექტიანი საარჩევნო კამპანიით და იმ თანაგუნდელებით, იმ კანდიდატებით, რომლებსაც თვითმმართველობის არჩევნებზე წარვადგენთ, – ამის შესახებ პარლამენტის თავმჯდომარემ, არჩილ თალაკვაძემ საკანონმდებლო ორგანოში გამართულ ბრიფინგზე განაცხადა.
„აქვე მინდა ვუთხრა ჩვენს მხარდამჭერებს, რომ „ქართული ოცნება“ და ჩვენ, მთელი გუნდი მხარდამჭერებთან ერთად ვართ მომავალზე ორიენტირებულები. სწორედ ამით არის განპირობებული ის, რომ „ქართულმა ოცნებამ“ ამ შემთხვევაშიც პასუხისმგებლიანი და მომავალზე ორიენტირებული გადაწყვეტილებები მიიღო“, – განაცხადა თალაკვაძემ.