შარლ მიშელის დოკუმენტზე ხელმომწერები პრეზიდენტთან ინდივიდუალურ შეხვედრებს მართავენ. ოპოზიცია სალომე ზურაბიშვილისგან პარლამენტის მიერ მიღებულ ადმინისტრაციულ სამართალდარღვევათა კოდექსში შეტანილ ცვლილებებზე ვეტოს გამოყენებას ითხოვს.
ორბელიანების სასახლეში შეხვედრაზე უკვე იმყოფებოდა სალომე სამადაშვილი, პრეზიდენტს ამ წუთებში „სტრატეგია აღმაშენებლის“ ლიდერი, გიორგი ვაშაძე ხვდება. ოპოზიციონერების თქმით, შეხვედრები პრეზიდენტის ინიციატივით იმართება.
„შევთანხმდით იმაზე, რომ უნდა გადაიდგას ნაბიჯები სწორედ იმ მიმართულებით, რომ ქვეყანაში დემოკრატიული სივრცე გაფართოვდეს და არა პირიქით, შეიზღუდოს. ამიტომ, მე მიმაჩნია, რომ ეს ცვლილებები, რომლებიც პარლამენტმა ოპოზიციის სრულფასოვანი თანამონაწილეობის გარეშე, დაჩქარებული წესით მიიღო, არ შეესაბამება მათ შორის იმ შეთანხმების სულისკვეთებას, რომელიც გავაფორმეთ სწორედ აქ, პრეზიდენტის თანდასწრებით. ამიტომ, ცხადია, მიმაჩნია სწორი იქნება მისი მხრიდან ვეტოს უფლების გამოყენება, თუმცა ეს მისი გადასაწყვეტია“, – განაცხადა სალომე სამადაშვილმა.
გიორგი ვაშაძე კი ცვლილებებს „ანტიდემოკრატიულს“ უწოდებს.
„ერთია ვეტოს უფლება და მივესალმები თუ ამ ვეტოს გამოიყენებს პრეზიდენტი, ეს პირველი პრეცედენტი იქნება. მეორეა რომ ჩვენ პარალელურად ჩვენ მაინც ვამზადებთ საკანონმდებლო ინიციატივას“, – აღნიშნა ვაშაძემ.
გუშინ სალომე ზურაბიშვილმა ამ საკითხზე შეხვედრები „გირჩისა“ და „მოქალაქეების“ წარმომადგენლებთან გამართა.