„სტრატეგია აღმაშენებლის“ წევრი სერგო ჩიხლაძე „ნაციონალური მოძრაობის“ წევრ აკაკი მინაშვილს ურჩევს, „წვრილმანი ჟულიკები“ და „ხულიგნები“ თავის პარტიაში მოიკითხოს.
„ძალიან სამწუხაროა, როდესაც პოლიტიკოსი სხვა პოლიტიკოსზე ასეთ შეფასებებს აკეთებს. მით უმეტეს, სულ რაღაც რამდენიმე დღის წინ პარტნიორები ვიყავით. „წვრილმანი ჟულიკები“ და „ხულიგნები“ თავის პარტიაში მოიკითხოს ბატონმა მინაშვილმა.
ბატონ მინაშვილის გარდა, მოლაპარაკებებზე ათი, თერთმეტი სხვა ადამიანი იყო და ყველა ერთხმად ამბობს იმას, რასაც გიორგი ვაშაძე და ჩვენც ვამბობთ. მეც ვიყავი ზოგიერთ მოლაპარაკებაზე, როცა ბატონი გიორგი არ იყო. შესაბამისად, მეც ვადასტურებ, რომ ამნისტიასთან დაკავშირებით არანაირი მათი მოსაზრება, წინააღმდეგობა მოლაპარაკების მაგიდასთან, არც დანიელსონი როცა ატარებდა ამას, არც შარლ მიშელის დროს, არ ჰქონიათ. მათ ჰქონდათ მოსაზრებები და ჭმუნვები ადგილობრივ არჩევნებთან დაკავშირებით. აქ იყო გარკვეული პოზიციები, მაგრამ ამნისტიასთან დაკავშირებით მოლაპარაკების მაგიდაზე მათ საწინააღმდეგო არ დაუდგენიათ“, – განაცხადა სერგო ჩიხლაძემ.
მისივე თქმით, სხვა ოპოზიციური პარტიები უფრო მეტს აკეთებენ ნიკა მელიას გასათავისუფლებლად, ვიდრე „ნაციონალური მოძრაობა“.
„ხელს თუ არ გვიწყობენ, ხელს მაინც ნუ შეგვიშლიან ნიკა მელიას გათავისუფლებაში. ორი მექანიზმი არსებობს გირაო, ამნისტია, თუ ორივეზე უარს ამბობენ და არც ერთი არ მოსწონთ, მესამე თვითონ თქვან მაშინ, როგორ წარმოუდგენიათ, რომ ნიკა მელია გათავისუფლდება. თქვეს ეს მექანიზმი სადმე? არსად არ უთქვამთ, არ არსებობს სხვა მექანიზმი და ხელს ნუ შეგვიშლიან, ამას ბოლომდე მივიყვანთ. მელიაც თავისუფალი იქნება და სხვა არანაკლები მნიშვნელობის პუნქტები შესრულებული იქნება. ჯობია, გაჩერდნენ მაინც და დესტრუქციის მაგივრად ხელი მაინც არ შეგვიშალონ ამ პროცესში, თუ მათ სხვა ალტერნატივა არ აქვთ. როგორც ჩანს, არ აქვთ ალტერნატივა, საერთოდ, როგორ ფიქრობენ ნიკა მელიას გამოყვანას. ისეთი მდგომარეობაა, როდესაც სხვა ოპოზიციური პარტიები უფრო მეტს აკეთებენ მელიას გასათავისუფლებლად, ვიდრე მისი საკუთარი პარტია, რომელიც ყველა არსებულ მექანიზმზე უარს ამბობს“, – განაცხადა სერგო ჩიხლაძემ.
აკაკი მინაშვილმა „პოლიტიკური ჟულიკობა“ უწოდა გიორგი ვაშაძის განცხადებას, რომლის მიხედვითაც, დანიელსონის დოკუმენტში ამნისტიასთან დაკავშირებულ ჩანაწერს მთელი “ნაცმოძრაობა” ეთანხმებოდა და ამაზე საჯაროდ ერთხელაც არ გამოუთქვამთ წინააღმდეგობა“.