შშმ პირების უფლებების დაცვის დღესთან დაკავშირებით, შშმ ქალებთან თემატური დისკუსია გაიმართა. შეხვედრა ა(ა)იპ შშმ ქალთა ეროვნული ქსელის ინიციატივითა და ნაძალადევის რაიონის გამგეობის ორგანიზებით ჩატარდა.
განხილვის თემა შშმ ქალების რეპროდუქციული ჯანმრთელობის კუთხით არსებული პრობლემები და მათი გადაჭრის გზების დასახვა იყო. მონაწილეებმა სხვადასხვა გამოწვევის შესახებ იმსჯელეს და დასმული საკითხების მოგვარების პროცესში სახელმწიფო უწყებებისა და თვითმმართველობის ჩართულობის აუცილებლობაზე ისაუბრეს.
შეხვედრის მოდერატორი ა(ა)იპ შშმ ქალთა ეროვნული ქსელის თავმჯდომარე თამარ მაჭარაშვილი იყო. დისკუსიაში მონაწილეობა მიიღეს შშმ ქალებმა, ნაძალადევის რაიონის გამგებელმა ირაკლი ხელაძემ, საქართველოს პარლამენტის იურიდიულ საკითხთა კომიტეტის თავმჯდომარის მოადგილე რატი იონათამიშვილმა, საქართველოს პარლამენტის გენდერული თანასწორობის საბჭოს თავმჯდომარე ნინო წილოსანმა, თბილისის საკრებულოს თავმჯდომარის მოადგილე მარიკა დარჩიამ, ა(ა)იპ ეროვნული სკრინინგ ცენტრის დირექტორმა ეთერ კიღურაძემ, გაეროს მოსახლეობის ფონდის (UNFPA) საქართველოს ოფისის ხელმძღვანელმა ლელა ბაქრაძემ, ასევე, შშმ პირების უფლებადამცველი ორგანიზებისა და სხვა სამთავრობო უწყებების წარმომადგენლებმა.
შეხვედრის ბოლოს ნაძალადევის რაიონის გამგებელმა შშმ ქალებს სასაჩუქრე ვაუჩერები გადასცა. თემატური დისკუსია ვეტერანთა კულტურისა და დასვენების პარკში მდებარე მედიათეკაში გაიმართა. შშმ პირების უფლებების დაცვის დღე საქართველოში ყოველწლიურად 14 ივნისს აღინიშნება.