ძალიან საინტერესოდ ემთხვევა გიორგი გახარიას კომენტარი „ნაციონალური მოძრაობის“ დღეს დალაგებულ მესიჯბოქსს, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ „ქრონიკის“ ეთერში განაცხადა.
„გიორგი გახარიას პარტია არის დღეს ყველაზე რთულ მდგომარეობაში, რადგან მათი პარტიის არსებობამ აზრი დაკარგა. მათ „საქართველოსთვის“ კი არა, „43%-სთვის“ უნდა ერქვათ. ერთ საინტერესო ამბავს მოგიყვებით. ისინი ყველა რაიონში არავის ეკარებოდნენ „ქართული ოცნების“ მომხრეების გარდა. აქვთ შესაბამისი ბაზა, რადგან ისინი ჩვენი თანაგუნდელები იყვნენ. თუ კი ვინმე ავტორიტეტული პიროვნება ან ლიდერი არის ამ ბაზაში, რომელიც არის ჩვენი აქტიური მხარდამჭერი, ყველასთან მიდიან და ჩვენი ხმების წამოღებას ცდილობენ. მათ ჰქონდათ კონკრეტული მიზანი, რომ კონკრეტულად ჩვენი და სხვა არავის მომხრეები გადაებირებინათ, 43%-ს რომ მიახლოებოდა ან 43%-ს ქვევით დაწეულიყო „ქართული ოცნება“. სხვა მიზანი მათ არ ჰქონდათ, საკუთარი რეიტინგიც კი არ ანაღვლებდათ ამდენად, რადგან ეს კონკრეტული დავალება და მისია ჰქონდათ. მათ ეს მისია აღარ აქვთ და ამ პარტიის არსებობამ აზრი დაკარგა“, – განაცხადა მამუკა მდინარაძემ.