რატომ ვერ ახერხებენ თურქეთის საზღვრის გადაკვეთას მოქალაქეები

სარფის საბაჟო გამშვებ პუნქტის ჩაკეტვას თურქეთის მხარე ტექნიკურ გაუმართაობას უკავშირებს. ოფიციალური თურქეთის ინფორმაციით, კომპიუტერულ ქსელზე კიბერშეტევა განხორციელდა.
დღეს დილით საბაჟოზე აჭარის მთავრობის მეთური ზურაბ პატარიძე და საქართველოში თურქეთის კონსული იასინ თემიქანი იმყოფებოდნენ.
„როგორც საქართველო, ასევე თურქეთის მხარე ერთობლივი ძალებით ვცდილობთ ამ პრობლემის მოგვარებას. არის ტექნიკური ხარვეზები, რის გამოც ჯერ უცნობია, როდის გადაწყდება ეს საკითხი, იქნება ეს ერთ თუ რამდენიმე საათში. არის კომპიუტერული სისტემა, რამაც გამოიწვია ეს პრობლემა”, – განაცხადა თურქეთის კონსულმა იასინ თემიქანიმ.
აჭარის მთავრობის მეთაურის განცხადებით, პრობლემა მხოლოდ სარფის საბაჟო პუნქტს არ ეხება. ზურაბ პატარაძის თქმით, ანალოგიური პრობლემები არის ყველა საზღვარზე, მათ შორის საერთაშორისო აეროპორტებში.
მისივე განცხადებით, ეს არის თურქეთის მთელს ტერიტორიაზე არსებული სისტემური პრობლემა. პატარაძე აცხადებს, რომ პრობლემა სავარაუდოდ, სწრაფად მოგვარდება.