“პატივს ვცემთ IRI-სა და NDI-ს, მაგრამ ორგანიზაციები, რომლებიც საველე სამუშაოებს ატარებენ, უშუალოდ „ნაციონალური მოძრაობის“ მიერ იმართებიან”

„ჩვენ არასდროს ვენდობოდით, ადგილზე, „ნაციონალური მოძრაობის“ კვლევითი ორგანიზაციების მიერ ჩატარებულ კვლევებს“, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებთან საუბრისას განაცხადა.

მთავრობის მეთაურის თქმით, საერთაშორისო ორგანიზაციების პატივისცემის მიუხედავად, მათ მიერ დაქირავებული ორგანიზაციების საქმიანობა ნდობას არ იწვევს.

„რა თქმა უნდა, ჩვენ პატივს ვცემთ IRI-სა და NDI-ს, მაგრამ მათ მიერ დაქირავებული ორგანიზაციების მიერ ადგილზე ჩატარებული კვლევები ძალიან დიდ კითხვის ნიშნებს იწვევს, რადგან ორგანიზაციები, რომლებიც ადგილზე კვლევებს, საველე სამუშაოებს ატარებენ, უშუალოდ „ნაციონალური მოძრაობის“ მიერ იმართებიან და კონტროლდებიან. შესაბამისად, არც IRI-სადა NDI-ს კვლევები არავითარ ნდობას არ იმსახურებს. ყველაზე მთავარი კვლევა არჩევნების დღეა. ჩვენი ხალხი გადაწყვეტს, როგორ განვითარდეს შემდგომ წლებში მოვლენები“, – აღნიშნავს ირაკლი ღარიბაშვილი.