მოსმენები იყო წარსულშიც, თუ სიმართლეს არ ვიტყვით, მოჯადოებულ წრეში ვიქნებით, – ამის შესახებ “მესამე ძალის” ლიდერმა გიორგი ვაშაძემ “მთავარი არხის” ეთერში განაცხადა.
“სუსი რეალურად დაკავებული უნდა იყოს კორუფციული ფაქტების გამოვლენაზე, მაგრამ რით არის დაკავებული? ჩვენ მიყურადებაზე და კონტროლზე. როცა მეუბნებიან, რომ წარსულშიც ასე იყო, ძალიან ცუდია, რომ ასე იყო. ამან მოუსწრაფა წინა ხელისუფლებას ბოლო. არ ნიშნავს, რომ ეს ქმედებები გამართლდება წარსულით”, – თქვა ვაშაძემ.
გადაცემის წამყვანის თეა ადეიშვილის კითხვაზე, ფიქრობს, რომ მაშინაც ყველა სასულიერო პირს უსმენდნენ? – ვაშაძე პასუხობს:
“არ ვიცი ასე უსმენდნენ თუ ისე, მაგრამ სიმართლე უნდა ვთქვათ – მოსმენები იყო წარსულშიც. თუ სიმართლეს არ ვიტყვით, ყოველთვის ვიქნებით მოჯადოებულ წრეში და ვერ გავარღვევთ”, – ამბობს ვაშაძე.
დამაზუსტებელ კითხვაზე – თქვენ ყოფილი ხელისუფლების წარმომადგენელი ხართ და ამიტომ გეკითხებით – ასეთი ტოტალური იყო თუ არა წარსულში ეს ყველაფერი? – გიორგი ვაშაძე ამბობს:
“არ ვიცი, მე ამ სისტემაში ცხოვრებაში არ მიმუშავია. სრულად ტოტალური იყო თუ ნახევრად, რა მნიშვნელობა აქვს?! ფაქტია იყო.”
გადაცემის წამყვანი კი პასუხობს: “არანაირი. მე ამ კრებსებში ვიპოვე ჩემი თავი და მაინტერესებს წარსულშიც მისმენდნენ თუ არა”.
გიორგი ვაშაძე კი ამბობს: “მე იუსტიციის სახლებში ვმუშაობდი და ამ სისტემაში არასოდეს მიმუშავია. მეზიზღება ეს სისტემა. ის, რაც ცუდი იყო, უნდა ჩავაბაროთ საბოლოოდ წარსულს, მესამე ძალის იდეა ეს არის, აღმშენებლობა გვინდა”, – განაცხადა გიორგი ვაშაძემ.