„სამი ადგილობრივი ორგანიზაციის მიერ მომზადებულ შუალედურ ანგარიშებში, ზოგადი ტენდენციაა იმის ხშირად მითითება, რომ „გამოვლენილი დარღვევები, თავისთავად, კანონდარღვევა არ არის, თუმცა ცუდი პრაქტიკაა და ზიანს აყენებს ჯანსაღი წინასაარჩევნო გარემოს შექმნას“, – აღნიშნა „ქართული ოცნების“ საზოგადოებასთან ურთიერთობის მდივანმა შალვა პაპუაშვილმა პარტიის ოფისში გამართულ ბრიფინგზე, სადაც ჟურნალისტებს მმართველი პარტიის განცხადება გააცნო.
საუბარია ორგანიზაციების – „საერთაშორისო გამჭვირვალობა – საქართველოს“, საქართველოს ახალგაზრდა იურისტთა ასოციაციისა (საია) და „სამართლიანი არჩევნების“ მიერ მომზადებულ შუალედურ ანგარიშებზე.
პარტიის განცხადების თანახმად, ორგანიზაციების მხრიდან, მსგავსი მითითებები საზოგადოებისთვის ბუნდოვანს ხდის, კონკრეტულმა პოლიტიკურმა სუბიექტმა ჩაიდინა კანონდარღვევა, თუ მისი ქმედება უბრალოდ არ შეესაბამება კონკრეტული ორგანიზაციის მიერ დადგენილ შიდა სტანდარტს.
„უნდა აღინიშნოს, რომ სულ ორი თვის წინ, მათ შორის არასამთავრობო ორგანიზაციების მონაწილეობით, ჩატარდა საარჩევნო კანონმდებლობის ფუნდამენტური რეფორმა, რომელიც პარლამენტმა თითქმის სრული კონსენსუსით მიიღო. ამ რეფორმის პროცესში, ყველა საკითხი, რომელიც უნდა ყოფილიყო აკრძალული კანონმდებლობით, აიკრძალა კანონმდებლობით. შესაბამისად, რეფორმიდან ორი თვის თავზე, სადამკვირვებლო ორგანიზაციების მხრიდან კიდევ დამატებითი კრიტერიუმებით პარტიების აქტივობების შეფასება და ამის ისე წარმოჩენა, თითქოს ეს კანონდარღვევაა, ჩვენი შეფასებით, არ პასუხობს კეთილსინდისიერი დაკვირვების სტანდარტს. ამიტომ, მოვუწოდებთ ამ ორგანიზაციებს, იმ შემთხვევაში, თუ ისინი გადაწყვეტენ დამატებითი კრიტერიუმებით შეაფასონ პოლიტიკური სუბიექტების ქმედებები, გააკეთონ ეს გამჭვირვალედ და საზოგადოებისთვის აღქმადი გახადონ, მათი დასკვნის რომელი ნაწილი შეეხება საარჩევნო კანონმდებლობის შესაძლო დარღვევებს და რომელი ნაწილი არის მათი ორგანიზაციის მიერ დადგენილი სტანდარტის. ეს განსაკუთრებით შეეხება კანონმდებლობის დარღვევების და ორგანიზაციის შიდა სტანდარტის დარღვევების ერთ სტატისტიკაში გაერთიანებას, რაც წარმოშობს ცრუ აღქმას დარღვევების რაოდენობასა და სიმძიმესთან დაკავშირებით“, – აღნიშნა შალვა პაპუაშვილმა.
„ქართული ოცნების“ გუნდის მიერ გაანალიზებული მონაცემებით, ასევე იკვეთება ტენდენცია, რომ ანგარიშებში აღწერილია ისეთი შემთხვევები, რომლებიც ემყარება მხოლოდ დაინტერესებული მხარის ან მესამე პირის მიერ მოყოლილ ამბავს და სუბიექტურ აღქმებს, ისე, რომ არ იკვეთება რაიმე ირიბი მტკიცებულებაც კი. მმართველი პარტია მოუწოდებს ამ ორგანიზაციებს, იხელმძღვანელონ მტკიცების მინიმალური სტანდარტით მაინც, რომ მათი ანგარიშები უნებლიედ არ გახდეს დეზინფორმაციის გავრცელების ინსტრუმენტი.
„მნიშნველოვანია ასევე, რომ ორგანიზაციებმა თავიანთი ანგარიშებიდან ამოიღონ ის შემთხვევები, რომლებიც უკვე დადგინდა, რომ დარღვევას არ წარმოადგენენ, რაც, ჩვენი დაკვირვებით, ჯერჯერობით, არ ხდება“, – აღნიშნა შალვა პაპუაშვილმა.
მმართველი პარტიის განცხადების მიხედვით, 3 ადგილობრივი ორგანიზაციის შუალედურ ანგარიშებში, რომლებიც წინასაარჩევნო კამპანიისას გამოვლენილ ფაქტებს უნდა მოიცავდეს, საარჩევნო კამპანიის დაწყებამდე მომხდარი ფაქტებია მოყვანილი.