„ქართული ოცნების“ ხელვაჩაურის მუნიციპალიტეტის მერობის კანდიდატი, ზაზა დიასამიძე, ახალშენში, მოსახლეობას ხვდებოდა, რა დროსაც, „ნაციონალური მოძრაობის“ კანდიდატმა შეხვედრის ჩაშლა სცადა.
ამ მიზნით, მიხეილ ბოლქვაძე შეხვედრაზე ოჯახის წევრებთან და თანაგუნდელებთან ერთად მიიჭრა. მას თან ბავშვიც ახლდა.
ხმაურის ფონზე, ზაზა დიასამიძისა და მოსახლეობის შეხვედრა მაინც გაიმართა.
„ნაციონალური მოძრაობა“ პროვოკაციებს თავს არ ანებებს“ ,- ასე გამოეხმაურა „ქართული ოცნების” მაჟორიტარი დეპუტატი აჭარის უმაღლეს საბჭოში, ტიტე აროშიძე „ნაციონალური მოძრაობის“ კანდიდატებისადა აქტივისტების დღევანდელ ქმედებებს.
ის მომხდარს ამორალურ ქმედებას უწოდებს და არ გამორიცხავს, „ნაციონალურმა მოძრაობამ“ სამომავლოდაც სცადოს პროვოკაცია.
„თავიდან, პროვოკაციისთვის, მიიჭრნენ„ქართული ოცნების“ ოფისში, შემდეგ კი, როცა ჩვენი მერობის კანდიდატი მოსახლეობას ხვდებოდა, ასევე მიიჭრა, ოღონდ – ბავშვთან ერთად. შეიძლება ითქვას, ესაა მორალური ფსკერი – ამორალური და ყოვლად მიუღებელი საქციელი. უკვე ბავშვსაც რევენ პოლიტიკასა და იმ სიბინძურეში, რასაც „ნაციონალური მოძრაობა“ აკეთებს. მოვუწოდებ ჩვენს ამომრჩევლებს, ჩვენს მხარდამჭერებს, რომ არანაირ პროვოკაციას არ აჰყვნენ. ცხადია, ასეთი პროვოკაციები კიდევ მოსალოდნელია „ნაციონალური მოძრაობის“ დაჯგუფებისგან. თამამად შეიძლება ითქვას, რომ ჩვენ ამ არჩევნებს მოვიგებთ, გავიმარჯვებთ დამაჯერებლად – მიუხედავად არჩევნებამდე ასეთი ამორალური საქციელებისა“, – აღნიშნა ტიტე აროშიძემ.