ჩემთვის ეს არჩევნების რეფერენდუმია, – ამის შესახებ გადაცემაში „არჩევნები 2021“ ვახტანგ მეგრელიშვილმა განაცხადა. „გირჩის“ ერთ-ერთმა ლიდერმა მაყურებელს შეახსენა, რომ შარშან პარტია პირველად შევიდა პარლამენტში, რის შემდეგაც ორ ნაწილად დაიშალა.
„ახლა ჩვენთვის მნიშვნელოვანია დავინახოთ, ვის წარმოვადგენთ, მართლა რა წონა გვაქვს? ხომ შეიძლება აღმოვაჩინოთ, რომ არავის წარმოვადგენთ?“ – განაცხადა მეგრელიშვილმა.
მან ასევე აღნიშნა, რომ საპარლამენტო არჩევნების შემდეგ პოლიტიკურ ველზე კონფიგურაცია მნიშვნელოვნად შეიცვალა და შესაძლოა თვითმმართველობის არჩევნების შემდეგ ნათელი გახდეს, რომ მეათე მოწვევის საკანონმდებლო ორგანო მოსახლეობის განწყობას აღარ ასახავს.
„მაგალითად, „ქართული ოცნება“ და გახარია. წარმოიდგინეთ, რომ „ქართულმა ოცნებამ“ მიიღო 40% და გახარიამ მიიღო 8%. სიტყვაზე ვიძახი. რა თქმა უნდა, აქ შეიძლება მექანიკურად დაინახო, რომ შარლ მიშელის ის 43%-იან ზღვარს ქვემოთ არის „ქართული ოცნება“, მაგრამ შენთვის ხომ გასაგები არის, რომ ამ ორი პარტიის ჯამი 48%-ს გაძლევს, რა შედეგსაც წინა არჩევნებზე შენ აპროტესტებდი გაყალბების გამო. აქედან გამომდინარე, არ გრჩება იმის არგუმენტი, რომ „ქართულმა ოცნებამ“ წინა არჩევნები გააყალბა“, – განაცხადა მეგრელიშვილმა.