სოციალურ ქსელში ვრცელდება ციხის ბუნტის ერთ-ერთი დაზარალებულის, ბერდია ფიცხელაურის მეუღლის, მწერალ დინა მირცხულავას ემოციური წერილი, რომელსაც მირცხულავა სამხედრო პოლიციის დეპარტამენტის ყოფილი უფროსის მეგის ქარდავას მეუღლეს, სოფო ფიფიას უძღვნის.
“გაუტეხელი”ქმრის წელში გამართული ცოლის სტატუსი ვნახე, უტიფრობის უმაღლესი დონე.
თავიდან რაღაცნაირად შევიკავე თავი – ქმარია, შვილის მამა და შევეცდები გავუგომეთქი.
მაგრამ მერე გაგება გადავიფიქრე,“- წერს დინა მირცხულავა და აღნიშნავს, რომ დამნაშავის მეუღლეს, რომელსაც ქმრის დანაშაულების შესახებ გადმოცემით მაინც გაუგია, შეუძლია „ჩუმად იყოს ბედნიერი.“
მირცხულავა წერს, რომ წერილის დაწერა სოფო ფიფიას ფეისბუქ პოსტმა აიძულა, სადაც ფიფია ამბობს, რომ ამაყი და წელგამართული ცოლია.
„გამარჯობა, სოფო!
ჩემი გვარ – სახელი არაფერს გეუბნება ალბათ.
სამაგიეროდ, მე შემიძლია, მოგიყვე შენი ქმრის “საქმენი საგმირონი…”
ხუთი თვის პატარა გვყავს, ნანატრი შვილი- შეგვეცოდა, ვერ გავიმეტეთ და ძიძა არ ავუყვანეთ.
დილიდან გამოსული ვარ, ასე სჭირდება ჩემს საქმეს და ჩემი ქმარი მწერს – რთულია, ვეღარ ვიმორჩილებ, მძიმეა, ბევრს მოძრაობს, ეს თითებიც რომ არ მივარგა და ხელს როგორც მინდა, ისე რომ ვერ ვხმარობ…
რა შუაშია და შენმა “გაუტეხელმა” ქმარმა წაართვა ის ბედნიერება, მამები რომ შვილებს ააგდებენ მაღლა, სულ უფრო მაღლა და ჰაერში იჭერენ მერე…
იმისათვის რომ შენ დღეს წელგამართული და ამაყი ყოფილიყავი, ჩემმა ქმარმა ისწავლა მარცხენა ხელით წერა, მარცხენა ხელით ჭამა, უარი თქვა საჭის მართვაზე და სამუდამოდ დაემშვიდობა -ნადირობას – მის დიდ გატაცებას.
იმისათვის რომ შენ დღეს ამაყი ყოფილიყავი – ჩემს ქმარს საფრანგეთში ჩაუტარდა ორი ოპერაცია და ექვსთვიანი თერაპიის კურსი დაენიშნა ყოველდღიურად, წარმოგიდგენია ?!
ყოველდღე წვიმასა თუ ქარში, თოვლსა და ქარბუქში დადიოდა დღეში სამი საათი, ხან ფეხით და ხან ტრანსპორტით, სოფელში ვცხოვრობდით მაშინ…და რა გადავიტანეთ, კაცმა არ იცის.
მაგრამ თითები ვერ აღუდგინეს, ექიმმა დანანებით გვითხრა, რომ ოპერაციისას მხოლოდ “უცხო სხეულებისაგან”გავათავისუფლეთო… ალბათ ხვდები, “უცხო სხეულებში” რა იგულისხმება.
იმ ხუთი ტყვიის უცხო სხეულებს დღესაც დაატარებს ჩემი ქმარი.
და როგორც კი დადგება სექტემბერი და შემოდგომის სუსხი დაიწყება, ჩემი ქმარი შავ ხელთათმანს იკეთებს ხელზე და გვიან გაზაფხულამდე არ იხსნის, იმიტომ რომ სიცივეზე აუტანელი ტკივილები ეწყება.
მერე ამ შავი ხელთათმანით ხშირად ვხვდებით გაუგებრობაში მაღაზიასა თუ აფთიაქში, ტრანსპორტსა თუ საავადმყოფოში…
და ეს ყველაფერი, გადატანილთაგან მცირედი, მხოლოდ და მხოლოდ შენი “გაუტეხელი” ქმრის გამო და იმიტომ რომ შენ დღეს წელგამართული იყო.
ჩემი და შენი ქმარი იქეთ იყოს… უფრო სწორად, შენი ქმარი იყოს იქეთ და ჩემი – ჩემთან და უახლესი ისტორიიდან ერთადერთი გაუტეხელი კაცი ვიცი მე – მერაბ კოსტავა.
სირცხვილია.
წერტილი,“- წერს დინა მირცხულავა.
ცნობისათვის, „ციხის ბუნტის” სახელით ცნობილ პატიმართა მასშტაბურ ამბოხებას, რომელიც 2006 წლის 27 მარტს თბილისის მე-5 საპყრობილეში მოხდა, 7 ადამიანის სიცოცხლე შეეწირა. დაშავდა 22 პატიმარი.
უკრაინიდან საქართველოში ექსტრადირებულ მეგის ქარდავას ბრალი „ციხის ბუნტის“ ეპიზოდზეც წაუყენეს. ქარდავა ინტერპოლის წითელი ცირკულარით 2013 წლის 13 თებერვლიდან საქართველოს სამართალდამცავი ორგანოების მიერ იძებნებოდა. მისი ექსტრადიცია უკრაინიდან საქართველოში 17 სექტემბერს განხორციელდა.
მეგის ქარდავას ექსტრადირების შემდეგ სოციალურ ქსელში გავრცელდა ქარდავას მეუღლის სოფო ფიფიას წერილი მეუღლისადმი.
„წელგამართული ვარ და ამაყი, რომ ასეთი ქმარი მყავს. მე მჯერა შენი სიმტკიცის და ვიცი, არასდროს არ ვინანებ იმას, რომ ამდენი წელი გვერდით გედექი,“- ნათქვამია წერილში.