საქართველოს პრემიერ-მინისტრმა, ირაკლი ღარიბაშვილმა გადაცემაში „ნოესთან“ ბიძინა ივანიშვილის პოლიტიკაში მოსვლის ფაქტი გაიხსენა.
ღარიბაშვილის თქმით, ივანიშვილის მიერ გაკეთებული ცნობილი განაცხადა პოლიტიკაში მოსვლასთან დაკავშირებით, მისთვის დიდი სიხარული იყო, რადგან მისი თქმით, „იმ დროს ქვეყანაში ცხოვრება აუტანელი იყო“.
„საინტერესო ამბავი მინდა მოგიყვეთ, რომელიც საჯაროდ არასდროს მითქვამს. 4 ოქტომბერს დამირეკა და მითხრა, რომ მასთან 09:00 საათზე ავსულიყავი. ეზოში მხვდება ბატონი ბიძინა და ანზორ ჩუბინიძე, რომელიც ახლა სამთავრობო დაცვის უფროსია. მაწვდის საკუთარი ხელით ფურცელზე დაწერილ ტექსტს და მეუბნება, რომ გაეცანიო.
ვკითხულობ: „გადავწყვიტე შევქმნა პოლიტიკური პარტია და მონაწილეობა მივიღო 2012 წლის საპარლამენტო არჩევნებში“. მინდა ეს გამოაქვეყნოთო, მხოლოდ არავინ უნდა გაიგოსო.
09:00 საათია. მივდივარ „ქართუ ჯგუფში“, ვიბარებ პრესსამსახურის უფროსს და ვკეტავ ჩემს ოთახში. მოკლედ ასე გავრცელდა ეს ისტორიული განცხადება. რა თქმა უნდა, ეს ნაწერი ახლა ჩემს სახლში, სეიფში ინახება“, – განაცხადა ღარიბაშვილმა.