ივერთუბნის დასახლებაში მიმდინარე პროექტებსა და სამომავლო გეგმებზე „ქართული ოცნების“ თბილისის მერობის კანდიდატმა კახა კალაძემ და ჩუღურეთის რაიონის მაჟორიტარი დეპუტატობის კანდიდატმა ზურაბ ჩიკვილაძემ სოციალურ ქსელში ვიდეოჩართვისას ისაუბრეს.
„ივერთუბანში დაგეგმილია მასშტაბური რეკრეაციული სივრცის მოწყობა. ულამაზესი სივრცეა, სადაც ვფიქრობთ, ძალიან კარგი პარკი მოვაწყოთ თავისი გამწვანებით, განათებისა და სარწყავი სისტემით. ისეთივე პროექტი განხორციელდება, რა მიდგომა და დამოკიდებულებაც გვაქვს, ზოგადად, პარკებთან და სკვერებთან მიმართებაში. საკმაოდ დიდი ტერიტორიაა და დარწმუნებული ვარ, ერთ-ერთი საუკეთესო სივრცე მოეწყობა ადგილობრივი მოსახლეობისთვის“, – აღნიშნა კახა კალაძემ.
ჩუღურეთის მაჟორიტარი დეპუტატობის კანდიდატის, ზურაბ ჩიკვილაძის თქმით, ივერთუბნის განვითარებისთვის არაერთი ინფრასტრუქტურული პროექტი ხორციელდება.
მისივე თქმით, ზოგადად, ივერთუბანის დასახლება პრობლემური თემაა, ვინაიდან აღნიშნული ტერიტორია წინა ხელისუფლების დროს დედაქალაქს ისე შემოუერთეს, არანაირი თანხა მომავალი წლების ბიუჯეტში მის განსავითარებლად არ განსაზღვრეს.
„ქართული ოცნების“ ხელისუფლებაში მოსვლისთანავე ეს მანკიერი ფილოსოფია მთლიანად ამოვატრიალეთ და დავიწყეთ ელემენტარულით – გზების, წყალარინების, განათებების მოწესრიგება. 2022 წელს ასევე ჩაფიქრებული გვაქვს სპორტული მოედნის მოწყობა და ბავშვებისთვის გასართობის ცენტრის გაკეთება“, – განაცხადა მაჟორიტარი დეპუტატობის კანდიდატმა.