პოლონეთის პარლამენტმა მიიღო საკანონმდებლო ცვლილება, რომლის მიხედვითაც, საზღვრის დამცველებს უფლება აქვთ, დაუყოვნებლივ გააძევონ მიგრანტები, რომლებიც საზღვარს უკანონოდ გადაკვეთენ, – ამის შესახებ BBC წერს.
მათ ასევე მიენიჭებათ უფლება, უარი თქვან საერთაშორისო თავშესაფრის მოთხოვნაზე, განხილვისა და გამოკვლევის გარეშე.
ადამიანის უფლებათა დამცველი ჯგუფები კანონმდებლებს აკრიტიკებენ და აცხადებენ, რომ საერთაშორისო სამართლის თანახმად, ყველას, ვინც ეძებს საერთაშორისო თავშესაფარს, უნდა ჰქონდეს შესაძლებლობა, დაიწყოს შესაბამისი პროცესი, თუნდაც საზღვარი არალეგალურად ჰქონდეს გადალახული. ამასთან, აკრძალულია ადამიანების უკან გაგზავნა, თუ მათ, დაბრუნების შემთხვევაში, კონკრეტულ ადგილას საფრთხე ემუქრებათ.
მხოლოდ აგვისტოს განმავლობაში, პოლონეთის საზღვრის უკანონოდ გადაკვეთისთვის, 8-ჯერ მეტი ადამიანი დააკავეს, ვიდრე მთელი 2020 წლის განმავლობაში.