ბათუმში, 26 მაისის ქუჩაზე, ტრაგედიის ადგილას, მივიდა გია შომახია, რომლის ცოლ-შვილიც ნგრევას ემსხვერპლა. შემთხვევის ადგილას, ამ დრომდე, ადგილობრივებთან ერთად, მიდიან ტურისტებიც და გარდაცვლილთა ოჯახების წევრებს უსამძიმრებენ.
„უკიდურესად დამწუხრებული ვარ იმით, რაც მოხდა. შეიძლება, ჩემს სიტყვებს ვერ იგებთ, თუმცა, ვფიქრობ, ჩემი ხმის ტემბრით მიხვდებით, რომ ძალიან ვწუხვარ. ყველაფერი კარგად იქნება. გამაგრდით, იყავით ძლიერი. თქვენ არ ხართ მარტო. ბათუმსა და მთელ საქართველოს უყვარხართ. ჩვენ თქვენ გვერდით ვართ. მადლობა და ბედნიერი ვარ, რომ ჩემი პატივისცემის გამოხატვა შევძელი“, – უთხრა ტურისტმა მგლოვიარე კაცს.
ბათუმში, 26 მაისის ქუჩაზე, 13 ნომერი კორპუსის ერთი სადარბაზო 8 ოქტომბერს, დაახლოებით, 12:00 საათზე ჩამოინგრა. შემთხვევას 9 ადამიანის სიცოცხლე ემსხვერპლა, მათ შორის – 3 ბავშვი. ერთი ადამიანი ამ დრომდე ექიმების მეთვალყურეობის ქვეშ რჩება – ზვიად თავდგირიძე ერთადერთია, რომელიც ნგრევის დროს კორპუსში იყო და გადარჩა. ის ხელოვნური ვენტილაციიდან მოიხსნა და დადებითი დინამიკა აქვს.
საცხოვრებელი კორპუსის ნგრევის ფაქტზე მიმდინარე გამოძიების ფარგლებში 3 ადამიანი დააკავეს. გამოძიება საქართველოს სსკ-ის 240-ე მუხლის მე-2 ნაწილით და 187-ე მუხლის მე-3 ნაწილით მიმდინარეობს. დანაშაულები 2-დან 10 წლამდე ვადით თავისუფლების აღკვეთას ითვალისწინებს.