„ევროპარლამენტში შეხვედრები გვქონდა იმ ადამიანებთან, რომლებიც მუშაობენ საქართველოს საკითხზე, ნამდვილად ადარდებთ საქართველოს ევროპული მომავალი და მიიჩნევენ, რომ მნიშვნელოვანია საქართველოსთვის ფოკუსირება მომავლის დღის წესრიგზე“, – აცხადებს ევროპასთან ინტეგრაციის კომიტეტის თავმჯდომარე, მაკა ბოჭორიშვილი, რომელიც ბრიუსელში შეხვედრებს განაგრძობს.
მისი თქმით, ევროპარლამენტარებს სურთ, საქართველოსი მაქსიმალური სიმშვიდე იყოს.
„ბუნებრივია, რომ, ამ კონტექსტში, ისინი პრობლემად მიიჩნევენ ყოფილი პრეზიდენტის მიერ გადადგმულ ნაბიჯს. იმ ნაბიჯს, რომელსაც მოჰყვა ქვეყანაში არალეგალურად შემოსვლა და რასაც სახელმწიფოს მხრიდან მოჰყვა შესაბამისი შემდგომი რეაგირება. დღეს მთელი აქცენტი კეთდება იმაზე, რომ ჩვენ დავგეგმოთ ჩვენი ქვეყნის მომავალი. უნდა დავგეგმოთ და ვაგრძელებთ ევროინტეგრაციისთვის საჭირო რეფორმებს, ვმუშაობთ, თუ როგორ მივიყვანოთ ჩვენი ქვეყანა ევროკავშირამდე. ევროპარლამენტარებთან შეხვედრისას, ჩვენი მთავარი მიზანი არის ვისაუბროთ აღმოსავლეთ პარტნიორობის სამიტსა და სამიტის შემდგომ გეგმებზე“, – აღნიშნა მაკა ბოჭორიშვილმა.