„გვინდა, მოვუწოდოთ ქართველ საზოგადოებას; დღეს, ორ საათზე, ჩამოდით რუსთავში და მტარვალ სააკაშვილს პირში მივახალოთ, რას უშვებოდა პატიმრებს, პოლიტპატიმრებს, უკანონო პატიმრებს, ზოგადად, საზოგადოებას და რის ღირსია ის საზოგადოებისგან“, – განაცხადა ყოფილმა პოლიტპატიმარმა, ზაზა დავითაიამ ჟურნალისტებთან, სადაც დღეს, რუსთავის ციხესთან აქცია დააანონსეს.
მისი თქმით, საზოგადოებამ, მიხეილ სააკაშვილს, რომელიც თავს პოლიტპატიმარს უწოდებს, უნდა აჩვენოს, თუ ვინაა ნამდვილი პოლიტპატიმარი და რას იმსახურებს საზოგადოებისგან.
„აქ ვართ იმ პოლიტიკური პატიმრების ნაწილი, რომელთაც საკუთარ კისერზე გადავიტანეთ სააკაშვილის რეჟიმის სისხლიანი რეპრესიები. ჩვენთვის ძალიან გამაღიზიანებელია ტენდენცია, როდესაც ადამიანი, რომელმაც სისტემური დანაშაულის ორგანიზება მოახდინა და წამების პრაქტიკა დანერგა საქართველოში, დღეს პოლიტპატიმრის სტატუსის დაჩემებას ცდილობს და საზოგადოების გარკვეული ნაწილი მას ჯიუტად აკუთვნებს ამ სტატუსს. გვინდა, საზოგადოებას შევახსენოთ, თუ ვინ არის ნამდვილი პოლიტპატიმარი, რეჟიმისა და რეპრესიების ნამდვილი მსხვერპლი. ჩვენ მარტო არ ვართ, ჩვენ უკან არიან დაღუპული ბიჭების სულები, რომლებიც ამ რეჟიმმა იმსხვერპლა. ეს ბიჭებიც ჩვენთან ერთად იქნებიან ნებისმიერი აქციის დროს“, – აღნიშნა ზაზა დავითაიამ.