„კირკიტაძე – ხულიგანი, უგულავა – ხულიგანი, მელია – ხულიგანი. ხულიგნების მთელი კოჰორტა შემოგვთავაზა, მათ შორის, მეორე ტურისთვის, „ნაციონალურმა მოძრაობამ“. რა თქმა უნდა, ისინი მიიღებენ შესაბამის პასუხს“, – განაცხადა „ქართული ოცნების“ თავმჯდომარემ, პარტიის ცენტრალურ ოფისში გამართულ ბრიფინგზე.
მისი თქმით, გუშინ, რუსთავში მომხდარმა ინციდენტმა კიდევ ერთხელ გამოავლინა „ნაციონალური მოძრაობის“ რეალური სახე.
„გუშინდელი ინციდენტით, თქვენ ნახეთ, როგორია „ნაციონალური მოძრაობის“ სახე და ამ სახის ერთ-ერთი „საუკეთესო“ მაგალითია დავით კირკიტაძე. ის ჩვეულებრივი ხულიგანია. მან, თავის დროზე, „ნაცმოძრაობის“ დროს, ახალი დეპუტატი იყო, ჯერ დაცვის თანამშრომელს სცემა, შემდეგ, ანალოგიური ინციდენტი, გუბერნატორობისას ჰქონდა, როცა, საფეხბურთო მატჩის დროს, მსაჯს სცემა. გუშინ კი – რუსთავის ერთ-ერთ მოქალაქეს, რომელიც, სამწუხაროდ, მათ ოფისთან იყო მისული“, – აღნიშნა ირაკლი კობახიძემ.
რუსთავში „ერთიანი ნაციონალური მოძრაობის“ საარჩევნო შტაბთან დაპირისპირება იყო. დავით კირკიტაძის ინფორმაციით, ოფისზე მოხდა თავდასხმა და იყო შეჭრის მცდელობა. მიუხედავად მისი მტკიცებისა, არსებობს ვიდეო, რომელიც თავად მის ხულიგნობას ასახავს.