გია ვოლსკი რუსთავში, დავით კირკიტაძის მონაწილეობით მომხდარ ინციდენტს გამოეხმაურა. პარლამენტის პირველმა ვიცე-სპიკერმა „ქრონიკაში“ აღნიშნა, რომ „ნაციონალური მოძრაობა“ დესტაბილიზაციას ცდილობს.
„ცნობილი იყო, რომ წყნარი ლაპარაკი და ამავე დროს ფეხისა და მუშტის მოქნევა სჩვევია და ეს არაერთხელ ჩაიდინა. იცის ისტორიამ მისი პოლიტიკური მოღვაწეობა და იგივე გააკეთა ახლაც. მაგრამ ეს ერთი შემთხვევა არ არის. ფაქტია, რომ ეს სტრატეგია იქიდან გამომდინარეობს, რასაც დესტაბილიზაციის მცდელობა ჰქვია. არ შეიძლება, პროგრამა არ ჰქონდეს ადამიანს და სხვა მეთოდი აირჩიოს, რომელიც მოაგებინებს. მელია რომ თავს დაესხა კობახიძეს და ეს ჩვეულებრივ ამბად მიიღო ჩვენი ოპონენტების საზოგადოებამ და შემდეგ ამაზე სხვადასხვა ინტერპრეტაცია დაიწყეს, ვფიქრობ, ეს არის ინდიკატორი და სტილის კარნახი, თუ როგორ უნდა იმოქმედოს პირველ ტურში საკმაოდ სერიოზულად დამარცხებულმა „ნაციონალურმა მოძრაობამ“, – განაცხადა ვოლსკიმ.
რუსთავში „ერთიანი ნაციონალური მოძრაობის“ საარჩევნო შტაბთან დაპირისპირება იყო. დავით კირკიტაძის ინფორმაციით, ოფისზე მოხდა თავდასხმა და იყო შეჭრის მცდელობა.