გია ვოლსკი აცხადებს, რომ ყველაფერი გაკეთდება იმისთვის, რომ მიხეილ სააკაშვილის ჯანმრთელობა იყოს სტაბილური. პარლამენტის პირველი ვიცე-სპიკერის თქმით, არავინ დაუშვებს სააკაშვილს ან ნებისმიერ პატიმარს რამე დაემუქროს.
„რატომ უნდა უნდოდეს ვინმეს რომელიმე პატიმართან და მით უფრო სააკაშვილთან დაკავშირებული რამე გაუგებრობა შეიქმნას?! ყველაფერი გაკეთდება იმისთვის, რომ მისი ჯანმრთელობა იყოს სტაბილური, ისევე, როგორც ნებისმიერი სხვა პატიმრის. სხვა ნებისმიერი პატიმარიც, ისევე, როგორც სააკაშვილი, თუ ამის აუცილებლობა გახდა, სხვა სამედიცინო მომსახურებასაც მიიღებს. რაც შეეხება უსაფრთხოებას, ამაზე კომენტარის გაკეთება ზედმეტია. ნუ ვიტყვით, რომ ნიკა გვარამია ჭკვიანურ კომენტარს აკეთებს, სურვილი აქვს, რომ ხალხი დარაზმოს და მობილიზაცია გააკეთოს, იქნებ რაღაც დაპირისპირებას გამორჩეს, ამ ვითარებაში ესენი ხომ ამაზე არიან ორიენტირებულები. ვინ დაუშვებს იმას, რომ სააკაშვილს ან ნებისმიერ პატიმარს რამე დაემუქროს?!“, – განაცხადა გია ვოლსკიმ „ქრონიკაში“.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.პატიმრობაში მყოფმა სააკაშვილმა შიმშილობა გამოაცხადა.