მიხეილ სააკაშვილმა ულტიმატუმი შეცვალა – ის 29 ნოემბერს ჩანიშნული სასამართლო პროცესისთვის ემზადება. მანამდე კი, ყოფილი პრეზიდენტი უარს ამბობს პროტესტის იმ ფორმაზე, რომლის მიხედვითაც, ის მკურნალობაზე უარს ამბობდა.
„მიხეილ სააკაშვილი დათანხმდა ჩვენს თხოვნას – ის არ შეწყვეტს მკურნალობას ორშაბათამდე, როგორც მინიმუმ, და ვნახავთ, რა იქნება ორშაბათს, შემდეგ კი, მას პროტესტის უფლებას ვერავინ ვერ წაართმევს, – ამის შესახებ ყოფილი პრეზიდენტის, მიხეილ სააკაშვილის ადვოკატმა შოთა თუთბერიძემ გორის ჰოსპიტლის დატოვების შემდეგ განაცხადა.
რაც შეეხება ექიმებს – ისინი ექსპრეზიდენტის ოჯახის წევრებს, ადვოკატებსა და მხარდამჭერებს მოუწოდებენ, ხშირი ვიზიტებისგან თავი შეიკავონ, რადგან ეს პაციენტის ჯანმრთელობის მდგომარეობაზე უარყოფითად აისახება.
„ყველას ვთხოვე, მის იურისტებსაც, ამხანაგებსაც, ოჯახის წევრებსაც, რომ ორი კვირა ეცლიათ ჩემთვის. თუ თქვენ ამ ადამიანსა და მის სიცოცხლეზე მართლა ზრუნავთ, ცოტა შეეცადეთ და ექიმებს ორი კვირა მოგვეცით, რომ ბოლომდე გამოვიყვანოთ ამ მდგომარეობიდან. თვითონ პაციენტთანაც ვიყავით მოლაპარაკებული. პაციენტი ნამდვილად არაჩვეულებრივად მოგვყვება ექიმებს. ჩვენ ვთხოვეთ, რომ დღეში 3 ვიზიტორზე მეტი არ იყოს და რომელი ვიზიტორი იქნება და ვინ შევა მასთან, ეს უკვე ექიმის გადასაწყვეტი არ არის. უბრალოდ, როცა ძალიან ბევრი ვიზიტორია და რომელიმე ვიზიტორი ძალიან დიდხანს რჩება, ადამიანი, რომელიც შიმშილიდან გამოდის და ახლა იწყებს ადეკვატურ და ნორმალურ კვებას, იღლება. ამაში რამე გასაკვირია?!, – განაცხადა სახელმწიფო კონსილიუმის წევრმა, ექიმმა, ელენე გიორგაძემ გორის სამხედრო ჰოსპიტალში მიხეილ სააკაშვილი მონახულების შემდეგ.