ქვეყანაში რთული ეპიდვითარებაა, კლინიკებში უამრავი ადამიანი ებრძის სიკვდილს. ამ ფონზე სპეციალისტები ახალი ვირუსის გამოჩენაზე საუბრობენ . ჯერჯერობით უცნობია, არის თუ არა „ომიკრონი“ სხვა ვარიანტებთან, მათ შორის „დელტა“ ვარიანტთან, შედარებით უფრო გადამდები და მძიმე. ამის გასარკვევად ახლა მუშაობენ სპეციალისტები. ისევ ისმის სპეციალისტების მოწოდებები, რომ ვაქცინები რჩება კრიტიკულად მნიშვნელოვან ზომად მძიმე დაავადებისა და სიკვდილიანობის შესამცირებლად.
პარლამენტის წევრი, ექიმი ლადო კახაძე თვლის, რომ მეტი ინფორმაცია უნდა მიეწოდოს საზოგადოებას, რომ ისინი ანტივაქსერების გავლენის ქვეშ არ მოექცნენ.
ლადო კახაძე:
_ მთელ მსოფლიოში ახალი შტამის, „ომიკრონის“ გამოჩენამ ძალიან დააფრთხო საზოგადოება. მეცნიერები ვარაუდობენ, რომ ის ძალიან სწრაფად გავრცელებადი ვირუსია, ითხოვენ 2-კვირიან სადამკვირვებლო პაუზას, რომ კარგად დააკვირდნენ. უნდა დაველოდოთ, დიდი გამოცდილების მქონე ადამიანები რა რეკომენდაციას გაგვიწევენ, როგორ ვიმოქმედოთ.
მსოფლიოს რამდენიმე ქვეყანამ, ახალი ვირუსის აღმოჩენის შემდეგ, უკვე ჩაკეტა საჰაერო სივრცე და ჩვენც აფრიკის წერტილებიდან არავის შემოვუშვებთ. მაქსიმალურად უნდა გავამახვილოთ ყურადღება და სახელმწიფო უნდა ჩავერთოთ აკრძალვაში, რომ ეს ახალი შტამი როგორმე არ შემოიპაროს ჩვენს ქვეყანაში.
დიდი მნიშვნელობა აქვს მოსახლეობის პასუხისმგებლიან დამოკიდებულებას. ყველას უნდა, რომ პანდემია არ იყოს, სახელმწიფომ ყველა რეკომენდაცია დაახვედრა ვირუსს, მისი პრევენციისთვის ინფრასტრუქტურული ნაწილი მომზადდა, მობილიზებულია საწოლი ფონდებიც.
გამოცდა გავიარეთ, როგორ შეიძლება საველე პირობებში ჩართვა ამ საქმეში. მედპერსონალი 2-ჯერ გადამზადდა, ოჯახის, სოფლის ექიმები ჩაერთნენ პროცესში. გადასატან აფთიაქებს აცრის წერტილები დაემატა, სატელევიზიო რეკლამა მიდის და ადამიანებს აცრისკენ მოუწოდებენ. პროფესიული კუთხით ჩართულობა დიდია.
რაც მსოფლიოში ოპერირებს, ქვეყანაში ვაქცინის ოთხივე სახეობაა, და მოსახლეობას აქვს არჩევანის საშუალება. დღეს წახალისების ორი ფორმაც არსებობს, ერთი გათამაშება, ლატარეა და მეორე 60 წელს ზემოთ გადაცილებული ადამიანებისთვის, ვინც აიცრება, მატერიალური დახმარება 200 ლარის ოდენობით.
ერთნი თუ ვართ, უნდა დავიცვათ ის წესები, რასაც სპეციალისტები გვირჩევენ. სასკოლო სივრცეშიც დიდი მზაობაა. სულ 2090 საჯარო სკოლაა და 300 კერძო სკოლა, აქედან მხოლოდ 133 სკოლას აქვს პრობლემა და 350-მდე კლასს – ადაპტირების. ონლაინსწავლების რეჟიმში გადავიდნენ სკოლები. მოქმედებს ტელესკოლა. ყველაფერი კეთდება, რომ ვიყოთ დაცულები და ერთმანეთს ჯიბრში კი არ უნდა ჩავუდგეთ, ერთმანეთს გვერდში უნდა ამოვუდგეთ, დავიცვათ რეგულაციები და რაც მთავარია – ავიცრათ.
უნდა გავიაზროთ ერთი რამ, რომ არა ვაქცინა, კაცობრიობას უამრავი ვირუსული პათოლოგია შეუქმნიდა უდიდეს საფრთხეს. ვაქცინამ გადაარჩინა დედამიწა. ვიცით, რომ კორონას ანტივირუსული მკურნალობა პრაქტიკულად ჯერ ჰორიზონტს მიღმაა. მაინც სიმპტომურ მკურნალობაზე ვართ, ერთადერთი პრევენციული საშუალება – აცრაა, რომ მოსალოდნელი საფრთხის მიმართ ჩვენი იმუნური სისტემა გავაძლიეროთ. თუ აცრილი ხარ, ინტენსიურ თერაპიასა და რეანიმაციაში ნაკლებად მოხვდები, რაც მთავარია, არ გარდაიცვლები. კვლევამ დაამტკიცა, რომ, ყველა შემთხვევაში, აცრილი ადამიანების 99,2 მეათედზე მეტი დაცულია სიკვდილისგან. აცრა ერთი კომპონენტია, ამასთან ერთად, აუცილებლად უნდა დავიცვათ რეგულაციები. ნიღაბი გაიკეთეთ, ხელები ხშირად დაიბანეთ, ბევრი არ შეიკრიბოთ, სხვასთან ლაპარაკის დროს დაიცავით დისტანცია და სახეში ნუ დაუწყებთ ყურებას, რადგან ეს ვირუსი წვეთებით ვრცელდება და შესაძლოა, რაიმე საფრთხე მართლაც შეგიქმნათ.
მეორე – დაცვის მექნიზმი შემოიტანა მსოფლიომ. ეს არის „მწვანე პასპორტი“, ეს ნიშნავს გაფრთხილებას, რომ მე – მასპინძელი ვარ სუფთა, და სტუმარიც სუფთ ავარ. თუ ამით ქვეყანა კარგად იხელმძღვანელებს, კარგ შედეგსაც მივიღებთ. ბიზნესს მოეხსნა დროის შეზღუდვა, თავის მომხმარებლებს შესთავაზებენ „მწვანე სივრცეს“ და იტყვიან, ჩვენ ვართ სუფთა – „მწვანე სივრცე“, მომსახურე პერსონალის 45 პროცენტზე მეტი აცრილი გვყავს, თქვენ ჩვენგან საფრთხე არ გემუქრებათ და თქვენც ნუ შემოხვალთ აცრის გარეშე, დაგვიდასტურეთ „მწვანე პასპორტით“, რომ ხართ აცრილები და შემოდით სუფთანი. ასეთი ურთიერთპატივისცემით, გონიერებით უნდა გადავეღობოთ ამ გართულებას.
– სამწუხაროდ, ქვეყანაში ბევრი ანტივაქსერია, რომლებიც აფერხებენ სხვებსაც. მათ რას ეტყოდით?
-ნამდვილად სამწუხაროა. ცალკე გამოვაკვლევინეთ ანტივაქსერების თემა, რომლებიც ეწინააღმდეგებიან აცრის ინსტიტუტს, მხოლოდ და მხოლოდ გონიერებით უნდა შევებრძოლოთ ამ ტენდენციას. აცრა სავალდებულო არ არის, – ამბობს ხელისუფლება და ადამიანს უტოვებს უფლებას, თავად მიიღოს გადაწყვეტილება.
ჩვენ გვინდა, მათრახი კი არ გადავუჭიროთ ადამიანებს, თავად გაიაზრონ აცრის მნიშვნელობა. ამდენი რამ გავაკეთეთ და დაინახეთ თქვენი თავი, როგორც ვირუსთან ერთ-ერთი მებრძოლი და აიცერით.
პერიოდულად სხვადასხვა ასაკის ანტივაქსერებთან საუბარი მიწევს, ამბობენ, ვიღაცისგან გაიგეს, რომ აცრა ცუდია და არგუმენტები არ აქვთ. ბევრს არგუმენტული ახსნით დავუსაბუთე და დამიჯერა, ჩემი, როგორც პროფესიონალი ექიმის, მიმართ ნდობა მეტი აქვთ, ამიტომ აიცრნენ. ვფიქრობ, ასეთი მეტი აგიტაციაა საჭირო, განსაკუთრებით – ხანდაზმულებთან, ამას სჭირდება დაუღალავი განმარტებები. ტვინმა უნდა მოგცეს თანხმობა, ეს არის ტვინისა და გონიერების გადასაწყვეტი. ვირუსიც ზუსტად ამას აკეთებს, ებრძვის სუსტებს.
არ ვიცი, ეს ანტივაქსერები რა ძალებია, ამის განხილვას არ შევუდგები. 1000-მა კაცმა რომ თქვას, ვაქცინა საჭიროა და ერთმა – არა, იმ ერთ ანტივაქსერს დაუჯერებენ, რადგან ადამიანის ბუნება არის ასეთი – ეჭვიანი.
არადა, გვიტევს ახალი შტამები და აცრა ერთადერთი გამოსავალია, რომ დავიცვათ ჩვენი სიცოცხლე. მე მინდა ყველა ადამიანი იყოს ჯანმრთელი, სული მთელი ჰქონდეს და ადამიანების დისკრიმინაციას ვერ მოვახდენ, გამორიცხულია, თვითონ გადაწყვიტონ, აუცრელობით რამხელა ზიანის მიყენება შეუძლიათ საკუთარი თავისთვის.
იმედი მაქვს, რომ ისევ გონიერებამ, საღმა ნაბიჯმა უნდა გადაგვარჩინოს. ამ ვირუსის შესახებ დედამიწას ჰქონდა წარმოდგენა, იცოდნენ, რომ მრავალშტამიანია, ვირუსიც იბრძვის ჩვენს წინააღმდეგ და მას უნდა, რაც მეტი არეალში შეღწევა. რაც მეტად იქნება გაჯიუტებული ადამიანი და არ აიცრება, იმას ნამდვილად დაასნებოვნებს, მეტად გამრავლდება და მეტ პოპულაციას გამოიყენებს თავის გასამრავლებელ ნიადაგად და თავის სასარგებლო საქმეს გააკეთებს.
შეიძლება 32 ნაირსახეობის შტამი იყოს, ამას კიდევ ემატება ისიც, რომ თუ დროულად და მასობრივად არ გაკეთდა ვაქცინაცია, თუ ეს დროში გაიწელა და დიდი რაოდენობა არ აიცრა, ეს ცუდია. ახალმა შტამმა წინამორბედისგან იცის, რა წინააღმდეგობა ხვდება და შეიძლება დაცვის მექანიზმი გამოიმუშაოს, ანუ მუტაცია განიცადოს, ეს თეორიაა და თეორიას არსებობის უფლება აქვს.
ადამიანებო, გაიგეთ, აცრილი ადამიანი, აუცრელისგან განსხვავებით, დაცულია სიკვდილისგან და გართულებისგან. განსაკუთრებული თხოვნა მაქვს ხანდაზმულ ადამიანებთან, აცრის პოპულარიზაციაში, სამწუხაროდ, 31 პროცენტს არ აჭარბებს და აიცერით.
ჩვენი მოსახლეობის 70-80 პროცენტი აცრილი უნდა იყოს, ეს იქნება ძალიან კარგი მაჩვენებელი. მადლობა უნდა ვუთხრა, სკოლებს და განათლების სისტემას, 75 პროცენტზე ავიდა პედაგოგებისა და დამხმარეების აცრის მაჩვენებელი. თხოვნა მაქვს ყველასთან, გავუფრთხილდეთ ერთმანეთს. აცრა არ ვნებს დედამიწაზე არავის, 6 მილიარდზე მეტ ადამიანს ჩაუტარდა აცრა და გარდაცვალების მაჩვენებელია 0,00013.
საქართველოში გვყავს 2 მილიონ 130 ათასი აცრილი და აცრასთან დაკავშირებული გარდაცვალება მხოლოდ ერთი იყო, ისიც შესწავლის საგანია. ნათელში ამყოფოს იმ თავდადებული გოგოს სული, რომელიც მოწადინებული იყო აცრისთვის და ასეთი მძიმე ფაქტი კი მოხდა.
800 000 ადამიანი დაავადდა ჩვენთან და აქედან 11 000 გარდაგვეცვალა. საშინელი ციფრი გვაქვს. ჩვენ გაცილებით მეტი დასნებოვნებული ადამიანი გვყავს, ვიდრე ჩინეთს. ჩვენ სულ 3,7 მილიონი ვართ, აქედან 800000 დასნებოვნებულია. სტატისტიკა გამოიყენება მედიცინაში. ძნელი მოსატანია სტატისტიკა, როცა ადამიანის სიცოცხლეზე ვსაუბრობთ, მაგრამ რა ვქნა, უნდა დავიმოწმო ეს მძიმე სტატისტიკა. ჩვენ ყველაფერი უნდა გავაკეთოთ, რომ თავი დავიცვათ ნიღბითა და რეგულირების წესების დაცვით, პარალელურად, აუცილებლად უნდა გავზარდოთ აცრების კომპონენტი. ჩემ გარშემო აუცრელი ადამიანი არ არსებობს. მე ახლა „ბუსტერიც“ გავიკეთე.