დავით ზალკალიანმა განმარტა რაზე ისაუბრებს რიგაში, ნატოს მინისტერიალზე სიტყვით გამოსვლისას. საქართველოს საგარეო საქმეთა მინისტრმა ქვეყნისთვის სამიტის მნიშვნელობას გაუსვა ხაზი.
„ძალიან მნიშვნელოვანია, რომ საქართველო და უკრაინა ვართ მიწვეული ნატოს მინისტერიალზე. ეს არის კიდევ ერთი დასტური ჩვენი ნატოელი პარტნიორების მხრიდან, რომ საქართველოსა და უკრაინის შესრულებული პროგრესი ნატოში ინტეგრაციის გზაზე, არის კარგად მიღებული და ისინი ძალიან აფასებენ იმას, თუ რა კეთდება ნატოში ინტეგრაციის კუთხით, კერძოდ, პრაქტიკული ინსტრუმენტების რეალიზაციის თვალსაზრისით.
ჩვენ მაქსიმალურად გამოვიყენებთ ამ მინისტერიალს იმისთვის, რომ მომავალ პერსპექტივებზე ვისაუბროთ. ძალიან მნიშვნელოვანია, რომ საქართველოს, როგორც ასპირანტი ქვეყნის როლი შესაბამისად იყოს შეფასებული. მნიშვნელოვანია ისიც, რომ ჩვენ აქტიურად ვართ ჩართული ნატოს 2030 წლის სტრატეგიის შემუშავების პროცესში. მნიშვნელოვანია, რომ ღია კარის პოლიტიკა კვლავინდებურად იყოს პრიორიტეტული და შენარჩუნებული. მნიშვნელოვანია, რომ შავი ზღვის უსაფრთხოება მუდმივად იყოს ჩვენი ნატოელი პარტნიორების დღის წესრიგში. მნიშვნელოვანია, რომ პრაქტიკული თანამშრომლობის კუთხით და ყოველწლიური ეროვნული პროგრამა, რომელიც წარმოადგენს პრაქტიკულად ჩვენს მთავარ სამოქმედო გეგმას, იყოს შემდგომში კიდევ უფრო გაღრმავებული და გაძლიერებული.
რა თქმა უნდა, აქცენტს გავაკეთებ რეგიონში შექმნილ სიტუაციაზე და ასევე იმ უსაფრთხოების გარემოზე, რომელიც შექმნილია შავი ზღვის კონტექსტში და ეს მინისტერიალი მაქსიმალურად იქნება გამოყენებული იმ თვალსაზრისით, რომ მოვემზადოთ 2022 წლის ნატოს სამიტისთვის“, – განაცხადა ვიცე-პრემიერმა.