სააკაშვილი გაჯიუტებული ახალგაზრდასავით იქცევა, როდესაც რაღაც დააშავა ადამიანმა და არ უნდა აღიაროს, არ უნდა დაინახოს, – ამის შესახებ შალვა პაპუაშვილმა გადაცემაში „იმედი LIVE“ განაცხადა. „ქართულ ოცნების“ საზოგადოებასთან ურთიერთობის მდივნის თქმით, ყოფილმა პრეზიდენტმა, ისევე როგორც მისმა თანაგუნდელებმა სხვადასხვა უწყებაში, პრეზიდენტის ადმინისტრაციაში კორუფციული სქემა შექმნა.
„ვერ ხედავს საკუთარ დანაშაულს. უფრო სწორად, არ უნდა აღიაროს ეს და არ უნდა სიმართლეს გაუსწოროს თვალი. საერთო ჯამში, რასაც ვხედავთ, არის ძალიან დახვეწილი, ელიტური კორუფციის სქემა. ეს არის „ნაციონალური მოძრაობის“ იდეოლოგია, რომ ადამიანები ცდილობენ საკუთარი თავი დააყენონ როგორც კორუფციის წინააღმდეგ მებრძოლები. სინამდვილეში კი ვნახეთ, რომ სააკაშვილმა პრეზიდენტის ადმინისტრაციაში მოაწყო კორუფციის სქემა, გიგი უგულავამ თბილისის მერიაში მოაწყო კორუფციის სქემა და 48 მილიონ გააქრეს ბიუჯეტიდან. დავით კეზერაშვილმა თავდაცვის სამინისტროში მოაწყო ელიტური კორუფციის სქემა და 5 მილიონი ევრო ომამდე რამდენიმე თვით ადრე ფიქტიური წვრთნებით, რომელიც მხოლოდ ფურცელზე იყო, გადარიცხა ოფშორებში და ა.შ.“, – აღნიშნა პაპუაშვილმა.