თბილისის მერიის ეკონომიკური განვითარების საქალაქო სამსახურის ხელმძღვანელი ვახტანგ ლომჯარია კორონავირუსის საწინააღმდეგო ვაქცინის მესამე – ე.წ ბუსტერ დოზით აიცრა.
აღნიშნულის ამსახველი ფოტო ლომჯარიამ სოციალურ ქსელში განათავსა და იმ ადამიანებს მიმართა, ვინც აცრას იმიტომ არ იკეთებს, რომ უშვილობის ეშინია.
„2 სინოფარმის შემდეგ ფაიზერის ბუსტერი!
არა იმიტომ, რომ საერთოდ არ მეშინოდა სიკვდილის. იმიტომ, რომ სიცოცხლე უფრო მიყვარს და თავს ვალდებულად ვთვლი დავიცვა ცოლ-შვილი, მშობლები, მეგობრები და საკუთარი თავი.
ერთადერთი რის გამოც ბუსტერის გაკეთებაზე დავფიქრდი, იყო ჯანმოს განცხადება, რომ რიგ ქვეყნებს ვაქცინის დეფიციტი აქვთ, მაგრამ ვადა თუ გასდის, უნდა გავიკეთოთ.
თუ რამე მისწავლია, მიმიყვანა დასკვნამდე, რომ არ არსებობს ვაქცინის ალტერნატივა. ვაქცინაცია არის კაცობრიობის უდიდესი მიღწევა და მთელი რიგი მომაკვდინებელი დაავადებები უიარაღოდ დატოვა ჩვენს წინაშე. ჩვენი შვილები ასაკის გამო რომ ვერ იცრებიან, უგუნურების ან შეცდომაში შეყვანილი ხალხის გამო არ უნდა იყვნენ საფრთხეში. უმორჩილესად გთხოვთ, აიცრათ.
P.S. ვისაც აცრების შემდეგ უშვილობის გეშინიათ, პირად მაგალითზე გარწმუნებთ, რომ არ არის ასე. ორივე აცრილი ვართ და აპრილში მეორეს ველოდებით“, – წერს ლომჯარია.