სპეციალური პენიტენციური სამსახური აგრძელებს პენიტენციურ დაწესებულებებში სპორტისა და ჯანსაღი ცხოვრების წესის ხელშეწყობის პროცესს. ამ მიზნით, სპეციალური პენიტენციური სამსახურის გენერალური დირექტორის მოადგილე, გიორგი გიორგაძე და მორაგბე მამუკა გორგოძე N8 დაწესებულებაში მყოფ არასრულწლოვან ბრალდებულებს და N11 არასრულწლოვანთა სარეაბილიტაციო დაწესებულებაში მყოფ მსჯავრდებულებს შეხვდნენ, – ამის შესახებ ინფორმაციას სპეციალური პენიტენციური სამსახური ავრცელებს.
მათივე ინფორმაციით, სპორტსმენმა არასრულწლოვან ბრალდებულებს/მსჯავრდებულებს საკუთარი გამოცდილება გაუზიარა და სპორტის, ჯანსაღი ცხოვრების წესის მნიშვნელობაზე ესაუბრა.
შეხვედრის დასასრულს, სპეციალური პენიტენციური სამსახურის გენერალური დირექტორის მოადგილემ, გიორგი გიორგაძემ და მორაგბე მამუკა გორგოძემ არასრულწლოვან ბრალდებულებს/მსჯავრდებულებს საჩუქრად სპორტული ინვენტარი გადასცეს.
გიორგი გიორგაძემ მამუკა გორგოძეს არასრულწლოვანი ბრალდებულების/მსჯავრდებულების რესოციალიზაცია/რეაბილიტაციის პროცესში გაწეული დახმარებისთვის მადლობა გადაუხადა.
სპეციალური პენიტენციური სამსახური პენიტენციურ დაწესებულებებში სპორტისა და ფიზიკური აქტივობის ხელშეწყობის პროცესს მომავალშიც აქტიურად გააგრძელებს.
