დღეს ქეთევან დედოფლის გამზირის რეაბილიტაციას ვიწყებთ. ინფრასტრუქტურული პროექტი მეტრო „ავლაბრის“ მიმდებარე ტერიტორიიდან, ლეხ კაჩინსკის ახლად რეაბილიტირებულ ქუჩამდე, ორ კილომეტრამდე მონაკვეთს მოიცავს, – ამის შესახებ დედაქალაქის მერმა, კახა კალაძემ ქალაქის მთავრობის სხდომაზე განაცხადა.
მისი თქმით, გამზირის რეაბილიტაცია რამდენიმე ეტაპად განხორციელდება.
„პირველ ეტაპზე დაგეგმილი სამუშაოები 20 იანვარს დაიწყება და მოიცავს ავლაბრის მოედნიდან თელავის ქუჩამდე მონაკვეთს. პროექტის მიხედვით, მთლიანად შეიცვლება მიწისქვეშა საკომუნიკაციო ქსელები, გზის სავალ ნაწილზე ასფალტის ორფენიანი საფარი დაიგება, გარდა ამისა, საჰაერო გადამცემი ხაზები მიწის ქვეშ განთავსდება. სრული რეაბილიტაცია ჩაუტარდება გარე განათების ქსელს და დამონტაჟდება თანამედროვე სტანდარტების შესაბამისი LED სანათები, საზოგადოებრივი ტრანსპორტისთვის კი გამოიყოფა საავტობუსე ზოლი და მოეწყობა ველობილიკი.
დღეიდან, ოთხი თვის განმავლობაში აღნიშნული სარეაბილიტაციო სამუშაოების გამო მეტროსადგურ „ავლაბრიდან“ თელავის ქუჩის კვეთამდე საგზაო მონაკვეთში შეიზღუდება სატრანსპორტო საშუალებების გადაადგილება.
თბილისის მერიამ უკვე გაავრცელა დეტალური ინფორმაცია, თუ რა ალტერნატიული გზებით შეუძლიათ გადაადგილება როგორც კერძო, ასევე, საზოგადოებრივ ტრანსპორტს. აღნიშნული ინფორმაციის გაცნობა ყველა დაინტერესებულ პირს შეუძლია თბილისის მერიის ოფიციალურ ვებგვერდზეც“, – განაცხადა კახა კალაძემ.