იაგო ხვიჩიამ „იმედის კვირასთან“ ინტერვიუში მის ინიციატივაზე ისაუბრა, რომელიც „ნაციონალური მოძრაობის“ დაშლას და შედეგად მიხეილ სააკაშვილის გათავისუფლებას ითვალისწინებს. გირჩის ლიდერი აღნიშნავს, რომ „ნაციონალური მოძრაობა“ პარალიზებულია.
„პარალიზებული მთავარი ოპოზიციური ძალა ყველასთვის პრობლემაა – ხალხისთვისაც, დანარჩენი ოპოზიციისთვისაც. ერთადერთი, ხელისუფლებისთვის არის კომფორტული. მაგრამ პრობლემაა მიხეილ სააკაშვილისთვის, იმიტომ რომ ვერ გამოჰყავს ის ამ პოლიტიკურ ძალას. შესაბამისად, ამოწურა თავისი თავი ამ პარტიამ. დამთავრდა ეს ისტორია და სხვა ეტაპზე უნდა გადავიდეთ ჩვენი ცხოვრების. 5 ნომერი მიშას საკუთრებაა და მგონი მას უნდა გავატანოთ. როგორც საფეხბურთო კლუბმა „მილანმა“ ფრანკო ბარეზის 6-ნომრიანი მაისური მას გაატანა და არ გამოუყენებია, ჩვენც ასევე პატივით უნდა გავაცილოთ მიხეილ სააკაშვილი და 5 ნომერი ქართული პოლიტიკიდან“, – განაცხადა ხვიჩიამ.