პენტაგონის ხელმძღვანელი ეშტონ კარტერი, რომელიც რამდენიმე კვირაში თანამდებობას დატოვებს, აცხადებს, რომ აშშ გააგრძელებს რუსეთის აგრესიული ქმედებების წინააღმდეგ ბრძოლას და დაიცავს მოკავშირეებს.
“არ ვცდილობთ, რუსეთში მტერი დავინახოთ, უბრალოდ გვინდა, დავიცვათ ჩვენი მოკავშირეები, რაც ეფუძნება მსოფლიო წესრიგის და ნათელი მომავლის მყარ პრინციპებს”, – აღნიშნა პენტაგონის შეფმა.
კარტერმა რუსეთი დაადანაშაულა აგრესიულ ქმედებებში და განაცხადა, რომ რუსეთმა დაარღვია შეთანხმება შეიარაღების კონტროლსა და ესკალაციაზე ბირთვულ საფრთხესთან დაკავშირებით. კარტერმა რუსეთი გააკრიტიკა ასევე უკრაინასა და სირიაში ქმედებების გამო. ასევე დაადანაშაულა კიბერ შეტევებში. 3 დეკემბერს ამერიკის კონგრესის მიერ დამტკიცებული 2017 წლის თავდაცვის უწყების ბიუჯეტში, რუსეთთან თანამშრომლობისთვის საჭირო თანხების გამოყოფა აკრძალულია. BBC-ს ინფორმაციით, თანხები მხოლოდ იმ შემთხვევაში გამოიყოფა, თუ პენტაგონი კონგრესს მიაწვდის ინფორმაციას იმის შესახებ, რომ „რუსეთმა უკრაინის ტერიტორიის ოკუპაცია და აგრესიული ქმედებები შეწყვიტა, რომელიც უკრაინისა და ჩრდილოატლანტიკური შეთანხმების წევრი ქვეყნების სუვერენიტეტსა და ტერიტორიულ მთლიანობას ემუქრება“.