ვახტანგ მეგრელიშვილი „ნაცმოძრაობის“ მიერ ნიკა გვარამიას დაკავების შემდეგ გაჟღერებულ ინიციატივას გამოეხმაურა საპარლამენტო მანდატების დატოვების შესახებ. ამ თემაზე „გირჩის“ ერთ-ერთმა ლიდერმა „ქრონიკაში“ ისაუბრა. დეპუტატი ამ ინიციატივას სკეპტიკურად უყურებს.
„ნებისმიერი მოქმედება დღეს არის ინსტრუმენტი პოლიტიკურ თამაშში, პოლიტიკურ ბრძოლაში. როდესაც არ ხარ შენს პარტნიორებთან შეთანხმებული ამ თამაშის შინაარსზე… ფაქტობრივად ისეთი დისკომუნიკაცია გაქვს ამ პერიოდში ერთმანეთთან, რომ იდეაში შეუძლებელია ოპოზიცია მართლა შეთანხმებულიყო ან საერთოდ სერიოზულადაც კი აღექვა მსგავსი შემოთავაზება იმ ორწლიანი ისტორიის მერე, რომელიც ერთად გავიარეთ. ასე რომ არ მივაქცევდი ამ შეთავაზებას სერიოზულ ყურადღებას, იმიტომ რომ ვფიქრობ, „ნაცმოძრაობა“ საკმაოდ მძიმე მდგომარეობაშია ბევრი თვალსაზრისით და მათი დღევანდელი მოქმედებები რაციონალურ და ლოგიკურ ანალიზს ხშირად არ ექვემდებარება“, – განაცხადა მეგრელიშვილმა.