ვიცე-პრემიერისა და კულტურის მინისტრის, თეა წულუკიანის განცხადებით, ოპოზიცია ყველაფერს აკეთებს, რომ „ქართული ოცნების“ ხელისუფლებაში ყოფნის დროს, საქართველოს სვლა ევროინტეგრაციისკენ შეფერხდეს.
„ნორმალურ პირობებში, ოპოზიცია და ხელისუფლება ერთიანი უნდა იყოს, რადგან არ შეიძლება, ევროპულ გზაზე აზრთა სხვადასხვაობა იყოს. ამ ოპოზიციის პირობებში, სამწუხაროდ, ეს ვერ ან არ გამოდის. ყოველთვის ცდილობენ, რომ, ჩვენი ხელისუფლებაში ყოფნის პირობებში, ქართველ ხალხს ევროპულ გზაზე რაც შეიძლება მეტი სირთულე შეექმნას. მათ ვიწროპოლიტიკური ინტერესები დიდ, სახელმწიფოებრივ მიზნებში ერევათ“, – აცხადებს თეა წულუკიანი.
მაშინ, როცა ქვეყანა ევროკომისიის დასკვნის მოლოდინშია, მმართველი გუნდის შეფასებით, ოპოზიცია საერთაშორისო ასპარეზზე ქვეყნის ინტერესებს შეგნებულად აზიანებს. მაგალითისთვის, ოპოზიციის ნაწილს გასულ კვირაში შეხვედრები ბრიუსელში, ბერლინსა და ტალინში ჰქონდათ. გავრცელდა ლობისტებთან შეხვედრის ფოტოებიც. რადიკალური ოპოზიცია ირწმუნებოდა, რომ მათ ქვეყნის მხარდასაჭერად იმუშავეს. მათთან შეხვედრის შემდეგ, ევროპარლამენტარებმა მწვავე განცხადებები გააკეთეს.