აბსოლუტურად ვეთანხმები ნატოს გენერალურ მდივანს. უკრაინას არამარტო შეუძლია მოიგოს ეს ომი, არამედ უკრაინა აუცილებლად მოიგებს რუსეთთან ომს. უკრაინელი ჯარისკაცები არიან პროფესიონალები და ძალიან მოტივირებული, რადგან იცავენ საკუთარ ქვეყანას. ისინი ჩვენი დახმარებით – სანქციებითა და მიწოდებული იარაღით გამარჯვებას მოიპოვებენ, – ამის შესახებ ლატვიის პრეზიდენტმა „ქრონიკასთან“ ექსკლუზიურ ინტერვიუში განაცხადა.
„ჩვენ ომმა ორი რამ დაგვანახა და გვასწავლა. პირველი გაკვეთილი – ყველა ვფიქრობდით, რომ 21-ე საუკუნეში არ შეიძლებოდა ისეთი ომის პირისპირ დავმდგარიყავით, როგორც ეს მე-19 საუკუნეში იყო. თებერვალმა გვაჩვენა, რომ ეს შესაძლებელია, როდესაც არსებობს ისეთი აგრესიული სახელმწიფო, როგორიც რუსეთია. მზად უნდა ვიყოთ საკუთარი ტერიტორიების დასაცავად და მსოფლიო წესრიგს ილუზიებით არ ვუყუროთ. თავდაცვა ძლიერი უნდა გვქონდეს, ჯარი მზად იყოს, პოლიტიკურად და ეკონომიკური თვალსაზრისით გამკლავება უნდა შევძლოთ. თუ ძლიერები ვიქნებით, მაშინ ეს იმუშავებს, როგორც შეკავების პოლიტიკა, რადგან რუსეთი აგრესიულ ქმედებას განახორციელებს მასზე, ვინც საკმარისად ძლიერი არ არის. სიძლიერით რუსეთი უნდა შევაკავოთ.
მეორე გაკვეთილი – რუსეთი რა, თქმა უნდა, აგრესიული და საშიში ქვეყანაა, მაგრამ არ არის ყველაზე ძლიერი. ომმა გვაჩვენა, რომ ისეთ სახელმწიფოს, როგორიც უკრაინაა (და უკრაინა ერთ-ერთი ყველაზე დიდი ქვეყანაა ევროპაში, შეუძლია საკუთარი ტერიტორიის დაცვა. მითი დიდი, მრავალრიცხოვანი და ძლიერი რუსული არმიის შესახებ გაქრა. თუ საზოგადოება ერთიანია, ძლიერია, მოტივირებული, მაშინ მათ შეუძლიათ რუსეთის დამარცხება. რუსეთი აგრესიული სახელმწიფოა, მაგრამ აგრესორის მარცხი შესაძლებელია“, – აცხადებს ლევიტსი.