ამ განცხადებას სრულიად ვიზიარებ. სწორია რაც წერია, იმიტომ რომ აშშ-ის საელჩოს არ ახასიათებს ფავორიტიზმი, რომელიმე პოლიტიკოსის ან პოლიტიკური პარტიების მიმართ. ის მხარს უჭერს ყოველთვის ქვეყანას, – თქვა პარტია მოქალაქეების ერთ-ერთმა ლიდერმა ლევან იოსელიანმა „ქრონიკასთან“, რითაც გამოეხმაურა სასამართლო სისტემასთან დაკავშირებით აშშ-ის საელჩოს მიერ გავრცელებულ განცხადებას.
„მეორე საკითხია ჩვენ როგორ ვუყურებთ ამ ყველაფერს. იცით, რომ მე განსაკუთრებული კრიტიკით გამოვდივარ ხოლმე იმ სასამართლოს და მოსამართლეების მიმართ, რომლებიც წინა ხელისუფლების დროსაც იყვნენ და დღესაც აგრძელებენ საქმიანობას. მე მაქვს ეს დამოკიდებულება და ოპოზიციაშიც არის ეს დამოკიდებულება, ოღონდ ეს არანაირ კვეთაში არ არის ამერიკის სახელმწიფო პოლიტიკასთან ჩვენი ქვეყნის მიმართ, რომელიც არის აბსოლუტურად ნათლად განსაზღვრული და რომელიც მხარს უჭერს ამ ქვეყანაში ყველა დემოკრატიული ინსტიტუტის განვითარებას“, – განაცხადა იოსელიანმა.
გავრცელებული ინფორმაციით, „მთავარი არხის“ გენერალური დირექტორის, ნიკა გვარამიას საქმის მოსამართლე ლაშა ჩხიკვაძე აშშ-ს საელჩომ მოხსნა პროგრამიდან, რომლის ფარგლებშიც ის ამერიკის შეერთებულ შტატებში რამდენიმე დღეში მიემგზავრებოდა „ქართული ოცნების“ თავმჯდომარემ, ირაკლი კობახიძემ განაცხადა, რომ მოსამართლის კონკრეტული გადაწყვეტილების გამო სემინარზე არ დაშვება სისხლის სამართლის დანაშაულია.