პარლამენტში პრემიერ-მინისტრს ელოდებიან. ირაკლი ღარიბაშვილი კანონმდებლების წინაშე ინტერპელაციის წესით წარდგება. მთავრობის მეთაური ოპოზიციის შვიდკაციანმა ჯგუფმა დაიბარა, რომელშიც „ლელოს“ წევრები და უფრაქციო დეპუტატები შედიან. პრემიერს კონკრეტულ კითხვაზე მოუწევს პასუხის გაცემა, რომელიც უკრაინას და სანქციებს შეეხება.
„დღევანდელი მოსმენა არის ძალიან მნიშვნელოვანი, რადგან ჩვენ ვნახეთ, რომ მრავალჯერ გააფრთხილეს დღევანდელი ხელისუფლება, რომ საქართველო არ უნდა გახდეს შავი ხვრელი, საიდანაც მოხდება რეჟიმისგან სანქციების თავის არიდება. ჩვენ მოვითხოვეთ წარადგინოს პასუხი შეკითხვაზე – რა ადმინისტრაციული და სამართლებრივი ღონისძიებები გაატარა ხელისუფლებამ, რომ თავიდან აირიდოს ჩვენი ქვეყნის შავ ხვრელად გადაქცევა“, – განაცხადა „ლელოს“ წევრმა, სალომე სამადაშვილმა.
„მაინტერესებს გულწრფელი პასუხი, რა გამოწვევები გვაქვს საქართველოს ევროკავშირში კანდიდატის მინიჭების გზაზე, ასევე კითხვარზე პასუხის გაცემისას პასუხების შინაარსი რა იყო. პირველ რიგში მაინტერესებს საქართველოს მდგომარეობა, იმიტომ, რომ მოლდოვას და უკრაინას სხვანაირად განიხილავენ ევროპაში. საქართველო, რომელიც ლიდერი იყო ამ სამში, დღეს მესამეა. მაქვს ასევე შეკითხვა პრემიერთან – ვთქვათ, მოლდოვა და უკრაინა დააკმაყოფილებს და საქართველო არა, არის თუ არა ეს მისი პასუხისმგებლობა და რას ფიქრობს ის, ამ შემთხვევაში რა უნდა გავაკეთოთ ჩვენ, როგორც ქვეყანამ“, – განაცხადა „სტრატეგია აღმაშენებლის“ წევრმა, თეონა აქუბარდიამ.