საქართველოს პრემიერ-მინისტრი გიორგი კვირიკაშვილი ევროპარლამენტში „ევროპის სახალხო პარტიის“ ჯგუფის თავმჯდომარე მანფრედ ვებერს, ევროკავშირის საბჭოს თავმჯდომარე დონალდ ტუსკს, გაფართოებისა და სამეზობლო პოლიტიკის ურთიერთობის საკითხებში ევროკომისარ იოჰანეს ჰანს და ევროპარლამენტის თავმჯდომარე მარტინ შულცს ქვეყნის ვიზალიბერალიზაციის პროცესის მხარდაჭერისთვის მადლობას უხდის.
„მადლობას გიხდით, მანფრედ ვებერ, ევროპარლამენტში გაწეული დიდი სამუშაოსთვის. საქართველო და ქართველი ხალხი ელოდება ვიზალიბერალიზაციის პროცესის სწრაფ დასრულებას“, – პასუხობს საქართველოს პრემიერ-მინისტრი მანფრედ ვებერს.
„მადლობა თქვენი მხარდაჭერისთვის. ბედნიერი ვარ, რომ ევროკავშირი დანაპირებს ასრულებს. ახლა კი მივიღოთ დამსახურებული ვიზალიბერალიზაციის რეჟიმი საქართველოსთვის“, – აღნიშნავს გიორგი კვირიკაშვილი გაფართოებისა და სამეზობლო პოლიტიკის საკითხებში ევროკომისარ იოჰანეს ჰანის განცხადების საპასუხოდ.
„ნამდვილად, მიზანი თითქმის მიღწეულია. მადლობას გიხდით თქვენი ერთგულებისთვის ვიზალიბერალიზაციის საკითხში საქართველოსადმი გამოჩენილი მხარდაჭერისთვის“, – პასუხობს საქართველოს პრემიერ-მინისტრი ევროსაბჭოს თავმჯდომარე დონალდ ტუსკს.
„გასულ კვირას კარგი შეხვედრის შემდეგ კიდევ ერთხელ გიხდით მადლობას დიდი სამუშაოსთვის საქართველოსთვის ვიზალიბერალიზაციის მინიჭების კუთხით. ახლა ყველანი მოველით ამ პროცესის სწრაფად დამტკიცებას ევროპარლამენტის მხრიდან“, – უპასუხა გიორგი კვირიკაშვილმა ევროპარლამენტის თავმჯდომარე მარტინ შულცს.