თბილისში, საქართველოს მთავრობის ადმინისტრაციასთან აქცია დასრულდა. აქციის ორგანიზატორებს შეკრებილებისთვის ამ დრომდე არ გაუცნიათ გეგმა, თუ რას აპირებენ მომდევნო დღეებში, არც მომდევნო აქცია დაუანონსებიათ.
აქცია „შინ ევროპისკენ“ გუშინ საღამოს, 20:00 საათზე, პარლამენტთან დაიწყო. სიტყვით გამოსვლების შემდეგ, აქციის მონაწილეები კონკრეტულ სამოქმედო გეგმას ითხოვდნენ, თუმცა, გეგმის ნაცვლად, ორგანიზატორებმა აქციის ადგილი მოულოდნელი შეცვალეს და პარლამენტთან შეკრებილებს „ქართული ოცნების“ ცენტრალური ოფისისკენ წასვლა მოსთხოვეს. ამ გადაწყვეტილებამ აქციის მონაწილეთა ნაწილის უკმაყოფილება გამოიწვია, მათ შორის – სტუდენტების.
მოგვიანებით, შეკრებილთა ნაწილმა მთავრობის ადმინისტრაციასთან გადაინაცვლა და იქ ღამე გაათია.
ცოტა ხნის წინ, მთავრობის ადმინისტრაციაში საქართველოს პრემიერ-მინისტრი, ირაკლი ღარიბაშვილი შევიდა. მან ადმინისტრაციის ცენტრალური შესასვლელით ისარგებლა. მიუხედავად იმისა, რომ აქციის მონაწილეები სწორედ მის მისვლას ელოდნენ, მათ ეს ფაქტი გამორჩათ. მას შემდეგ, რაც შეკრებილებისთვის ცნობილი გახდა, რომ პრემიერი მთავრობის ადმინისტრაციაშია, ხმაური და შეძახილები დაიწყეს. როგორც ისინი ამბობდნენ, მთავრობის სხდომას უნდა დალოდებოდნენ და აპირებდნენ, მინისტრთა კაბინეტის წარმომადგენლებს უხერხულობა ხმაურით შეექმნათ.