რესპუბლიკურ საავადმყოფოში გარდაცვლილი ფეხბურთელის, 20 წლის ვახტანგ ჩარკვიანის მამის განცხადებით, მისი შვილის სამედიცინო ისტორია გაყალბებულია.
ჩარკვიანის თქმითვე, მას აღნიშნულის დამადასტურებელი არაერთი დოკუმენტაცია და ექსპერტიზის დასკვნა აქვს, რომელსაც მალე გაასაჯაროებს.
ოჯახის ინფორმაციით, საავდმყოფოში კოვიდით ინფიცირებულ ახალგაზრდას ნარკოტიკული საშუალებებით აბრუებდნენ.
ასევე საუბარია ფიზიკურ ძალადობაზეც. არსებობს ამის ფოტო მტკიცებულებები და არსებობს რეგულირების სააგენტოს დასკვნა, რომლის მიხედვითაც 7 ექიმის პასუხიმგებლობის საკითხი უნდა დადგეს.
გარდაცვლილი ფეხბურთელის მამა „პირველებთან“ ამბობს, რომ მისი შვილი ექიმებმა სასიკვდილოდ გაწირეს.
ისეთი აკრძალული პრეპარატები გაუკეთეს ჩემს შვილს, რომ ჩნდება გონივრული ეჭვი, რომ ჩემი შვილი იქნა ექიმების მიერ განწირული და მოკლული. საუბარია არაერთ ნარკოტიკულ საშუალებაზე, ასევე მძიმე მოქმედების მდიკამენტებზე, მათ შორის ერთ-ერთი არის ფენტალინი. დადგენილია, რომ ამ პრეპარატის მიღება აკრძალულია. თან ისეთი დოზებით აქვს ნაკეთები ეს მედიკამენტები, პლუს ამას დამატებული მორფინი, რომელიც თრგუნავს სასუნთქ ორგანოს. ასევე ფიზიკური ძალადობის კვალიც აღინიშნებოდა, არის ამის დამადასტურებელი ფაქტები, რომელიც დასურათებულია, მაგრამ ამას მტკიცებულებებითი ფორმა როცა მიეცემა მაშინ შეგვეძლება მტკიცებით ფორმაში ვისაუბროთ აღნიშნულთან დაკავირებით. ასევე სავარაუდო ნიშნები არის გაყალბებასთან დაკავშირებით და იმედი გვაქვს, რომ გამოძიება ექსპერტიზას დანიშნავს“ – ამბობს ვახტანგ ჩარკვიანის მამა.
ცნობისთვის, 20 წლის ფეხბურთელი, ვახტანგ ჩარკვიანი 10 სექტემბერს, რესპუბლიკურ საავადმყოფოში გარდაიცვალა. მას კლინიკაში შეყვანისას კორონავირუსი ჰქონდა, თუმცა, მისი ოჯახის განცხადებით, გარდაცვალებამდე ჩარკვიანს კოვიდი დამარცხებული ჰქონდა. მომხდართან დაკავშირებით გამოძიება სისხლის სამართლის კოდექსის 116-ე მუხლით მიმდინარეობს, რაც სიცოცხლის გაუფრთხილებლობით მოსპობას გულისხმობს.