„გირჩის“ ერთ-ერთი ლიდერი, ალექსანდრე რაქვიაშვილი გაუგებარს უწოდებს ოპოზიციის იმ ნაწილის ქცევას, რომელიც უარს ამბობს, ჩაერთოს მოლაპარაკებებში, რომლებიც ქვეყნისთვის ევროკავშირის წევრობის კანდიდატის სტატუსის მინიჭების ერთ-ერთი წინაპირობაა.
„უმრავლესობა გვეუბნება, მოდით, დავილაპარაკოთო. რა არგუმენტი უნდა გქონდეს, რომ არ დაელაპარაკო? შეიძლება, ადამიანს არ ენდობოდე, მაგრამ ამის გამო, საუბარზე უარს რომ ამბობ, ცოტა უცნაურად გამოიყურება. ეს, სულ მცირე, ა12 პუნქტთან მოდის წინააღმდეგობაში. ხომ გვითხრეს, პოლარიზაცია დაასრულეთო? თუ ადამიანს არ ელაპარაკები, მაშინ, რა ვიცი, უნდა ეჩხუბო და გამოდის, რომ შენ არ გინდა, რომ ეს პუნქტები შესრულდეს. არ მესმის, საუბარზე უარის თქმას რა შინაარსი აქვს“, – აცხადებს ალექსანდრე რაქვიაშვილი.
ევროკომისიის რეკომენდაციების შესრულებაზე პარლამენტის თავმჯდომარე შეხვედრებს მართვას. შალვა პაპუაშვილი უკვე შეხვდა მესამე სექტორს, დღის მეორე ნახევარში კი დაგეგმილია კონსულტაცია ოპოზიციასთან. პარლამენტის თავმჯდომარე, სამუშაო ჯგუფების საქმიანობას კოორდინაციას გაუწევს, დეპოლარიზაციისპუნქტის შესრულებას კი თავად უხელმძღვანელებს.